काठमाडौं, असोज ३०।
विराटनगर टाईटन्सले महिलाको फ्रेन्चाईज क्रिकेट लिग वुमेन च्याम्पियन्स लिग डब्लुसीएलमा विजयी सुरुवात गरेको छ । टियु क्रिकेट मैदानमा बिहिबार भएको खेलमा ललितपुर फाल्कोन्सलाई ४ विकेटले पराजित गर्दै विराटनगरले विजयी सुरुवात गरेको हो ।

ललितपुरले दिएको १ सय २३ रनको मध्यम लक्ष्य विराटनगरले १६ ओभरमा ६ विकेट गुमाएर पुरा गर्यो । विराटनगरको जितमा ज्योति पाण्डेले ६५ रनको अर्धशतकीय इनिङ्स खेले । उनले ४३ बलमा १० चौका र १ छक्का प्रहार गरे ।

ज्योति जारी लिगमा अर्धशतक प्रहार गर्ने दोस्रो खेलाडी बनिन् । यसअघि क्याट क्विन्स काठमाडौंकी रुबिना क्षेत्रीले अर्धशतक बनाएकी थिइन् । यस्तै सोनु खड्काले २४ तथा अश्मिना कर्मचार्यले १२ रन जोडिन् । ललितपुरकी सम्झना खड्काले २ विकेट लिईन् ।

यसअघि टस हारेर पहिले ब्याटिङ गरेको ललितपुरले २० ओभरमा ७ विकेट गुमाएर १ सय २२ रन बनाएको थियो ।ललितपुरका लागि ममता चौधरीले सर्वाधिक २८ रन जोडिन् । यस्तै करुणा भण्डारीले २१ रन बनाईन् ।कृति सेन र सम्झना खड्काले अविजित रहदै समान १३र१३ रन जोडिन् ।

विराटनगरकी सबनम राई र आरती बिडारीले एक एक विकेट लिईन् । जितसँगै विराटनगरले १ खेलमा २ अंक जोडेको छ । विराटनगर तालिकाको शीर्ष स्थानमा छ । ललितपुरले भने हारबाट प्रतियोगिताको सुरुवात गरेको छ ।