काठमाडौं, माघ ९ ।
राजधानी अहिले अघोषित रूपमा लोडसेडिङ मुक्त भएको छ । जसका कारण ऊर्जामन्त्री जनार्दन शर्मा प्रभाकर र नेपाल विद्युत प्राधिकरणका कार्यकारी प्रमुख कूलमान घिसिङलाई सबैले बधाईसमेत दिएका छन् ।

यसरी लोडसेडिङ मुक्त भएको केही महिना पनि बित्न नपाउँदै प्राधिकरण आफ्नै समस्याहरू देखाउँदै विद्युत महशुल वृद्धि गर्ने प्रस्ताव अगाडि सारेकोे छ । उसले घाटा क्रमशः बढ्दै गएको भन्दै पुनः विद्युत महशुल वृद्धि गर्न प्रस्ताव अघि सारेको हो । हुनतः यसअघि विद्युत प्राधिकरणले करिब ६ महिना अगाडि २० प्रतिशत महशुलमा वृद्धि गरेका थिए तर अझै पनि घाटामा गइरहेको भन्दै महशुल वृद्धि गर्न विद्युत महशुल निर्धारण आयोगसमक्ष प्रस्ताव पेश गरेको हो ।

सर्वसाधारण ग्राहकबाहेक औद्योगिक ग्राहकलाई २० प्रतिशत र ठूला सामुदायिक विद्युतीकरणको समेत महशुल वृद्धिका लागि प्रस्ताव गरिएको छ । विद्युत् महशुल निर्धारण आयोगका अध्यक्ष जगत भुषालले प्राधिकरणले महशुल वृद्धिको लागि प्रस्ताव गरेको जानकारी दिएका छन् ।

सबै उद्योगका ग्राहकलाई २० प्रतिशतका साथै सामुदायिक विद्युतीकरणमा २० प्रतिशतभन्दा बढी उपयोग गर्ने ग्राहकको हकमा तल्लो भोल्टेजका ग्राहकलाई ६।२५ पैसाबाट ७।७० र माथिल्लो भोल्टेजका ग्राहकलाई ६ रुपैयाँबाट ७।२५ बनाउन प्रस्ताव गरिएको छ ।

२० युनिटभन्दा कम बिजुली उपयोग गर्नेलाई भने वृद्धिको प्रस्ताव गरिएको छैन । यस्तै, गार्हस्थ्य ग्राहक अर्थात घरेलु ग्राहकलाई समेत महशुल वृद्धिको प्रस्ताव गरिएको छैन ।