काठमाडाैं, कार्तिक १३ ।
देशभरका अधिकांश नेवार समुदायले आज किजा पूजा अर्थात भाईटीका गरी मनाइँदै छ । तिथिमा घटबढका कारण विवाद भएपछि यो पटक एक दिन ढिलो गरी किजा पूजा हुन लागेको हो । म्ह पूजा गरेको भोलिपल्ट किजा पूजा गर्ने प्रचलन छ ।

ललितपुरका अधिकांश नेवार समुदायले मंगलबार नै किजा पूजा गरी मनाइसकेका छन् भने आज काठमाडाैं र भक्तपुरका अधिकांश नेवार समुदायले किजा पूजा गरी मनाइँदै छ ।

यसपटक तिथि विवादका कारण भक्तपुर र ललितपुरका अधिकांश स्थानमा सोमबार नै म्ह पूजा गरिएको थियो । उनीहरूले मंगलबार नै किजा पूजा गरेका छन् । काठमाडौंको धेरैजसो क्षेत्रमा भने मंगलबार मात्र म्ह पूजा गरिएको हो । मंगलबार म्ह पूजा गरेकाहरूले आज किजा पूजा गर्दै छन् ।

नेपाल सरकारले किजा पूजाको अवसरमा आज पनि सार्वजनिक बिदा दिएको छ । काठमाडौं उपत्यकाका नेवार समुदायले आफूहरूको भाई टीका तिथिअनुसार कार्तिक १३ गते पर्ने भएकाले बिदा माग गर्दै नेवार समुदायले प्रधानमन्त्री केपी शर्मा ओलीसमक्ष ज्ञापन पत्रसमेत बुझाएका थिए ।