काठमाडाैं, कार्तिक २१ ।
सन् २०२२ मा कतारमा आयोजना हुने विश्वकप फुटबलअन्तर्गत एशियन छनौटको कुबेतविरुद्धको खेल नेपालले घरेलु मैदानमा खेल्न नपाउने भएको छ । एक मात्र अन्तर्राष्ट्रिय रङ्गशाला दशरथ रंगशाला तयार नभएका कारण खेल नेपालमा नहुने भएको हो ।

अखिल नेपाल फुटबल संघ (एन्फा)ले एक प्रेस विज्ञप्ति जारी गर्दै भुटानमा खेल खेलाउनेबारे फिफा र एएफसीलाई प्रस्ताव पठाएको जनाएको छ । भूकम्पपछिको पुनर्निर्माण भइरहेको दशरथ रङ्गाशाला अन्तर्राष्ट्रिय मापदण्डअनुसार तयार भइनसकेको भन्दै एएफसीले खेल अन्यत्र सार्न निर्देशन दिएको थियो ।

कुवेतविरुद्ध नेपालले यहीँ मंसिर ३ गते खेल्ने भएकाे छ । यसअघि, अवे खेलमा नेपालले कुबेतको ७ गोल खाएको थियो । चाइनिज ताइपेइलाई २ विरुद्ध शून्य गाेलले पराजित गरेको नेपालले अष्ट्रेलियासँग ५ विरुद्ध शून्य गाेल र जोर्डनसँग ३ विरुद्ध शून्य गाेलले हार ब्यहोरेको थियो ।