ललितपुर, बैशाख १७ ।
स्वास्थ्य मन्त्रालयले क्यान्सर रोगको उपचारसम्बन्धी राष्ट्रिय नीति बनाउने तयारीमा जुटिरहेको स्वास्थ्यमन्त्री गगनकुमार थापाले जानकारी दिएका छन् ।

ललितपुरस्थित होटेल हिमालयमा आयोजित एक कार्यक्रममा बोल्दै मन्त्री थापाले छिट्टै क्यान्सरको उपचारसम्बन्धी राष्ट्रिय नीति ल्याइने जानकारी दिँदै उनले नेपालमा क्यान्सर रोगका बिरामीहरूको सही तथ्याङ्क राख्न सक्ने विधिसमेत नभएको बताउँदै सरकारले ल्याउने नीतिले सबै समस्या समाधान गर्न बाटो खुल्ने बताए ।

उनले भने, ‘क्यान्सरको उपचार गराउन नसकेका गरिब जनताका लागि दिँदै आएको एक लाख रुपैयाँलाई बढाउनेबारे अर्थ मन्त्रालयसँग छलफल भइरहेको छ ।’

कार्यक्रममा चिकित्सकहरूले क्यान्सरसम्बन्धी नीति तयार भएपछि क्यान्सरका बिरामीलाई कुन औषधी दिने, कुन किमो चढाउने, रेडियसन कुन समयमा दिने भन्ने स्पष्ट हुने जानकारी गराएका थिए ।

आज र भोलि दुई दिनसम्म चल्ने उक्त गोष्ठीमा डा. एन्ड्रेले क्यान्सरसम्बन्धी प्रस्तुतीकरण गरेका थिए । कार्यक्रममा सहभागी चिकित्सकहरूले सरकार र जनता दुबै एक भएर क्यान्सर निवारण प्रक्रिया अगाडि बढाउनु पर्ने बताएका छन् । अन्यथा क्यान्सर निवारणको लागि उपचार प्रक्रिया सम्भव नहुने जानकारी दिए ।