काठमाडाैं, मंसिर १६ ।
काठमाडाैंमा जारी रहेकाे १३ औँ दक्षिण एशियाली खेलकुद (साग)को औपचारिक उद्घाटनपश्चात् पहिलो दिनकाे विभिन्न खेलहरूमा नेपाली खेलाडीहरूले शानदार सुरुवात गरेका छन् ।

मार्सल आर्टमा नेपालले यसपटक पनि काठमाडौंमा आयोजित पछिल्लो आठौँ सागमा झैँ पदक बटुल्छन् भन्ने आशामा तुषारापात हुन नदिइ गर्विलो प्रदर्शन गर्दै पदकको भाँडा भर्न थालेका छन् ।

ट्रायथलनको महिला स्पर्धामा पनि नेपालले पहिलो पटक ऐतिहासिक स्वर्ण पदक जित्न सफल भएको छ । याेसँगै नेपालले अहिलेसम्म पाँच स्वर्ण, एक १ रजत र १ काँस्य पदक जित्न सफल भइसकेको छ ।

कराँतेको पुरुष एकल काँतामा मण्डेकाजी श्रेष्ठले स्वर्ण जित्दा तेक्वान्दोको पुम्सेतर्फ पनि कमल श्रेष्ठले स्वर्ण पदक खोसिन नदिन सफल भएका छन् । मण्डेकाजीले कराँतको पुरुष एकल काँतामा २५ दशमलव ७२ अंक बटुलेर २४ दशमलव ९२ अंक जोडेका पाकिस्तानका नियाम तुल्लाहलाई पछि पार्दै स्वर्ण पदक बटुल्न सफल भएका हुन् । मण्डेकाजीको स्वर्ण नेपालको लागि जारी सागको पहिलो स्वर्ण पदक थियाे ।

दक्षिण एशियाली खेलकुद सागको टीम कातामा पनि नेपालले स्वर्ण जितेको छ । फाइनलमा पाकिस्तानलाई हराउँदै नेपालले स्वर्ण जित्न सफल हाे ।

टीम काताको शीर्ष दुई स्थानमा रहेका टीमले फाइनल खेलेका थिए । जसमा नेपालले पाकिस्तानलाई पछि पार्दै उपाधि जित्न सफल भएकाे थियाे ।

नेपालले २४ दशलमव ८८ अंक प्राप्त गर्यो भने पाकिस्तानले २३ दशमलव ३ अंक हात पार्यो ।

यता, तेक्वान्दोको पुम्सेको २९ वर्षमुनिको स्पर्धामा कमल श्रेष्ठले तेक्वान्दोका लागि पहिलो स्वर्ण पदक दिलाउन सफल भए ।

यसैगरी, तेक्वान्दोको पुम्से ५८ केजीमा नेपालका गोविन्द आलेले पनि स्वर्ण पदक जित्न सफल सफल भएका छन् ।

उता, पोखरामा आजै सम्पन्न ट्रायथलनको महिलातर्फको स्पर्धामा पोखराकी घरेलु खेलाडी सोनु गुरुङले नेपाललाई ऐतिहासिक स्वर्ण पदक दिलाउन सफल भएकी छन् । सोनीले ट्रायथलनको निर्धारित दूरी १ घण्टा १३ मिनेट ४५ सेकेण्डमा पूरा गरेकी थिइन् ।

पुरुष ट्रायथलनमा भने नेपाल काँस्य पदकमा नै सीमित रहन पुग्यो । नेपालका बसन्त थारुले एक घण्टा ३ मिनेट ६ सेकेण्डमा निर्धारित दूरी पार गर्दै नेपाललाई काँस्य दिलाएका हुन् ।

त्यसैगरी, कराँतेको व्यक्तिगत महिला कातामा चञ्चला दनुवारले रजत पदक हात पारेकी छन् । उनले पाएको पदक नेपालको लागि जारी सागको पहिलो पदक हो । उनी पाकिस्तानकी साइदासँग झिनो अंकले पछि पर्दै रजतमा चित्त बुझाउन पुगेकी हुन् ।