पाेखरा, मंसिर १६ ।
जारी रहेकाे १३ औँ दक्षिण एशियाली खेलकुद प्रतियोगिता (साग)अन्तर्गत आज पोखरा रङ्गशालास्थित क्रिकेट मैदानमा भएको महिला क्रिकेटको उद्घाटन खेलमा नेपालले विजयी सुरुवात गरेको छ । आयोजक नेपालले पहिलो खेलमा माल्दिभ्समाथि १० विकेटको ठूलो जित दर्ता गर्न सफल भएकाे छ । टस जितेर पहिले ब्याटिङ गरेको माल्दिभ्स १० दशमलव १ ओभरमा १६ रनमै समेटिएको थियो । सात रनमा पहिलो विकेट गुमाएको माल्दिभ्सले ११ रनमा दोश्राे र तेश्राे, १५ रनमा चौथो, पाँचौँ, छैटौँ र सातौँ तथा १६ रनमा बाँकी विकेट गुमाएको थियो । माल्दिभ्सको पारीमा हम्जा नियाजले नौ तथा हाफ्सा अब्दुल्लाले चार रन जोडेकी थिइन् । बाँकी सबै खेलाडी शून्यमै आउट भए । नेपालले अतिरिक्त तीन रन दिएको थियो ।

जितका लागि १७ रनको लक्ष्यसहित मैदान उत्रिएको नेपालले पहिलो ओभरमै विजयी लक्ष्य पार गरेकाे थियाे । मात्रै पाँच बलको सामना गरेकी काजल श्रेष्ठले तीन चौका प्रहार गर्दै अविजित १३ रन जोडेकी थिइन् । पाँच बल फालेकी माल्दिभ्सका बलर समा अलीले चार अतिरिक्त रन दिएपछि ‘ननस्ट्राइक’मा रहेकी सीता मगरले एक बल पनि सामना गर्नु परेन ।

दुई दशमलव एक ओभरमा दुई मेडनसहित बिना रन ६ विकेट लिएकी अञ्जली चन्द ‘वुमन अफ दी म्याच’ भएकी छन् । करुणा भण्डारीले दुई ओभरमा दुई विकेट लिइन् । उनले एक मेडन राख्दै चार रन खर्चिएकी थिइन् । जितपछि नेपाली टोलीका कप्तान रुबिना क्षेत्री बेलबासीले प्रतियोगितामा राम्रो सुरुवात गर्न सकेकाेमा खुशी लागेको सुनाइन् । यही प्रतियोगिताका लागि आफूहरूले लामो समयदेखि कडा मेहनत गरेको बताउँदै उनले नेपाली महिला क्रिकेट टोलीले केही गरी देखाउने अवसरका रूपमा यो प्रतियोगितालाई लिएको बताइन् ।

माल्दिभ्सका कप्तान जुना मारियाले नेपाल बलियो टोली भएको धारणा व्यक्त गरिन् । पहिलो अन्तर्राष्ट्रिय खेल भएका कारण उत्कृष्ट प्रदर्शन गर्न नसके पनि यस प्रतियोगितालाई आफूहरूले अनुभव बटुल्ने अवसरका रूपमा लिएको उनले बताइन् । प्रतियोगिताअन्तर्गत भाेलि मङ्गलबार श्रीलङ्का र बङ्गलादेशबीच प्रतिस्पर्धा खेल हुनेछ ।

यसैबीच, माल्दिभ्सविरुद्धको पहिलो खेलमा नेपालले चार वटा नयाँ कीर्तिमानसमेत बनाउन सफल भएकाे छ । नेपाली बलर अञ्जली चन्दले दुई ओभरमा एक रन पनि नदिई छ विकेट लिइन् । यो टी–ट्वान्टीमा कीर्तिमान भएको नेपाली प्रशिक्षक जगतबहादुर टमटाले दाबी गरे । त्यस्तै माल्दिभ्सका नौ खेलाडी शून्य रनमै आउट भएको पनि अर्को कीर्तिमान भएको टमटाको भनाई थियाे । १६ रनमा अलआउट गर्नु अर्को कीर्तिमान हो भने मात्रै पाँच बलमा जित हासिल गर्नु पनि अर्को कीर्तिमान भएको उनको दाबी रहेकाे छ ।

यसअघि, नेपाल क्रिकेट सङ्घका केन्द्रीय सदस्य ऋषि गौतमको अध्यक्षतामा भएको उद्घाटन समारोहमा गण्डकी प्रदेशका आर्थिक मामिला तथा योजनामन्त्री किरण गुरुङले दुबै टोलीका खेलाडीसँग हात मिलाउँदै शुभकामना दिएका थिए । कास्की जिल्ला क्रिकेट सङ्घका अध्यक्ष सञ्जयकान्त सिग्देल, गण्डकी प्रदेश क्रिकेट सङ्घका अध्यक्ष देबेन्द्र प्रजुलगायतले क्रिकेटका सम्बन्धमा बोलेका थिए ।