काठमाडाैं, मंसिर १६ ।
नेपालमा जारी रहेकाे १३ औँ दक्षिण एशियाली खेलकुद (साग)मा नेपालले आज १५ स्वर्ण जितेको छ । नेपालले कराँतेमा सात, तेक्वान्दोमा सात र ट्रायथोलनमा एक स्वर्ण गरी १५ स्वर्ण जितेको हो । तेक्वान्दोको एकल पुम्सेमा नेपालले चार स्वर्ण जितेको हो । महिला एकलमा आयशा शाक्यले २९ वर्षभन्दा माथिको विधामा, पार्वती गुरुङले २३ देखि २९ वर्षसम्मको विधामा र सीना मादेनले २३ वर्षमुनिको विधामा स्वर्ण जितेका छन् । ५५ केजी तौल समूहमा लक्ष्मण तामाङ्गले स्वर्ण जिते ।

त्यस्तै, २३ देखि २९ वर्ष उमेर समूहको एकल पुम्से विधामा नेपालका कमल श्रेष्ठले स्वर्ण पदक जितेका हुन् । शाक्य र गुरुङले एकल पुम्सेमा र तामाङले बंगलादेशका खेलाडीलाई हराएर ५५ केजी तौल समूहमा स्वर्ण जितेका हुन् । उनले भारतका राहुल जैनलाई हराएर स्वर्ण जितेका हुन् । महिला टीम पुम्सेमा पनि नेपालले स्वर्ण पदक जितेको छ ।

यसैगरी, कराँतेतर्फ पुरुष एकल कातामा मण्डेकाजी श्रेष्ठले पाकिस्तानी खेलाडी नियमातुल्लाहलाई पराजित गरे । श्रेष्ठले २६ दशमलव ७२ अङ्क प्राप्त गरे भने नियमातुल्लाहले २४.९२ अङ्क प्राप्त गरे । उनले महशुस तामाङ र प्रबिन महर्जन सम्मिलित टीमबाट पनि स्वर्ण जिते । कराँतेको महिला टीम कातामा पनि नेपालले स्वर्ण जितेको छ । निर्मला तामाङ, सङ्गिता मगर र सरु कार्कीको टोलीले स्वर्ण जितेको हो । कराँतेको पुरुष कुमुतेमा नेपालका लक्ष्मण तामाङले बंगलादेशका मोहम्मद मस्तोफालाई पराजित गरेका हुन् । कराँतेको ८४ केजी तौल समूहमा विप्लवलाल श्रेष्ठले स्वर्ण जिते । उनले पाकिस्तानका मोहम्मद ताजलाई पराजित गरेर पदक जितेका हुन् ।

त्यसैगरी, ट्रायथोलन प्रतिस्पर्धामा नेपालकी सोनी गुरुङ्गले स्वर्ण पदक जितिन् । महिलातर्फको एलिट स्प्रिन्ट प्रतिस्पर्धामा नेपालकी सोनी गुरुङले एक घण्टा १३ मिनेट ४५ सेकेण्डमा निर्धारित दूरी पुरा गर्दै स्वर्ण जितेकी थिइन् । उनले भारतीय खेलाडीलाई १५ सेकेण्डले पछाडि पारेकी थिइन् । नेपालका लागि चञ्चला दनुवार, दिवस श्रेष्ठ र कृष्णबहादुर तामाङ्गले रजत पदक जितेका छन् । पुरुष ट्रायथेलनमा नेपालका वसन्त थारुले काँश्य पदक जितेका छन् ।