काठमाडाैं, मंसिर १७ ।
काठमाडाैं जारी रहेकाे १३ औँ दक्षिण एशियाली खेलकुद (साग)अन्तर्गत एथ्लेटिक्सको १० हजार मिटर दौडमा नेपालकी सन्तोषी श्रेष्ठले स्वर्ण पदक हात पार्न सफल भएकी छन् । उनले भारतकी कविता यादवलाई ०.०१ सेकेण्डले पछि पार्दै नेपाललाई एथ्लेटिक्समा पहिलो स्वर्ण दिलाएकी हुन् ।

त्रिपुरेश्वरस्थित दशरथ रङ्गलामा आज भएको खेलमा श्रेष्ठले ३५ मिनेट ०७.९४ सेकेण्डमा निर्धारित दूरी पार गर्दै स्वर्ण पदक हात पारेकी थिइन् । भारतकी कविताले ३५ मिनेट ०७.९५ को समय खर्चदै रजत पदक जितिन् । सोही स्पर्धामा श्रीलंकाकी निलान्थी लङ्काले ३५ मिनेट ५९.०२ सेकेण्डको समय खर्चदै काँश्य पदक हात पारेकी छन् ।

साग इतिहासमा नेपालको महिला एथ्लेटिक्स खेलाडीले जितेको यो पहिलो स्वर्ण हो । यसअघि, सन् २००६ मा श्रीलंकामा भएको सागमा नेपालकी कान्छीमाया कोजुले १० हजार मिटर दौडमा नेपालाई रजत पदक दिलाएकी थिइन् । योसँगै १३ औँ सागमा नेपालले २० स्वर्ण पदक हात पारेको छ ।