काठमाडाैं, मंसिर १७ ।
नेपालमा जारी रहेकाे १३ औँ दक्षिण एशियाली खेलकुद सागमा अहिलेसम्म नेपालले कूल स्वर्ण पदक संख्या २३ पुर्‍याएकाे छ भने कूल पदक संख्या ४४ पुगेको छ । आज तेक्वान्दो, उसु, कराँते, डुवाथोलन र एथ्लेटिक्सतर्फ १० हजार मिटरमा नेपालले स्वर्ण जितेको हो ।

तेक्वान्दोको गेरुगीतर्फ ६८ केजी मुनि तौल समूहमा नेपालका वीरबहादुर महराले स्वर्ण जितेका छन् । त्यसैगरी, तेक्वान्दोकै ४६ केजी मुनि तौल समूहको गेरुगीमा नेपालकी काजल श्रेष्ठले पनि स्वर्ण जितेकी छन् । उसुको थाउलोमा विजय सिञ्जाली र महिलातर्फ सुस्मिता तामाङले स्वर्ण जितेकी छन् ।

त्यस्तै, कराँतेको ६७ केजी मुनिको तौल समूहमा नविन रसाइलीले पनि स्वर्ण जितेका छन् । कराँतेकै ६८ केजी तौल समूहमा नेपालकी सुनिता महर्जनले स्वर्ण जितेकी छन् भने कराँतेकै ७५ केजी तौल समूहमा नेपालका गङ्गाराम कुशवाहले रजत जितेका छन् ।

त्यसैगरी, पोखरामा जारी डुवाथोलनमा नेपालले स्वर्ण र रजत पदक जितेको छ । पुरुष डुवाथोलनमा नेपालका हिमाल टमाटाले स्वर्ण र लक्ष्मण मल्लले रजत जितेका हुन् । एथ्लेटिक्सको १० किलोमिटर दौडमा नेपालकी सन्तोषी श्रेष्ठले स्वर्ण पदक जित्दै नेपालकाे स्वर्ण पदक संख्या थप बढाएकी थिइन् । एथ्लेटिक्सतर्फ नै १५ सय मिटर दौडमा नेपालका टङ्क कार्कीले काँश्य पदक जितेका छन् ।

यसैगरी, महिला भलिबलमा भने काँश्य पदकमा चित्त बुझाउन बाध्य भएका छन् । कराँतेको ६१ केजी मुनि तौल समूहमा नेपालकी अनु गुरुङले रजत जितेकी छन् । पहिलो दिन नेपालले तेक्वान्दो, कराँते र ट्रायथोलनमा गरी १५ स्वर्ण पदक जितेको थियो ।