काठमाडाैं, मंसिर १७ ।
काठमाडाैं जारी रहेकाे १३ औँ दक्षिण एशियाली खेलकुद प्रतियोगिता (साग) को चौथो दिन आज विभिन्न १६ खेलमा प्रतिस्पर्धा हुँदैछ । आज साग खेलअन्तर्गत एथ्लेटिक्स, ब्याडमिन्टन, क्रिकेट, साइक्लिङ, फुटबल, गल्फ, कराँते, खो खो, सुटिङ, टेबल टेनिस, तेक्वान्दो, ट्रायथोलन, टेनिस, कब्बडी, ह्यान्डबल र उसुमा प्रतिस्पर्धा हुनेछ ।

जसमा ब्याडमिन्टन, महिला क्रिकेट, ट्रायथलन र ह्यान्डबल पोखरामा हुनेछ भने बाँकी खेलहरू काठमाडौंमा हुनेछ ।

सागको पुरुष फुटबलअन्तर्गत लिगको दोश्राे खेलमा नेपालले आज श्रीलंकासँग प्रतिस्पर्धात्मक खेल खेल्दैछ । खेल दशरथ रङ्गशालमा साँझ ५ बजे हुनेछ ।

त्यस्तै, साग क्रिकेटअन्तर्गत महिलातर्फ आज नेपालले टेष्ट राष्ट्र बङ्गलादेशसँग खेल्दैछ । पोखरा रङ्गशालामा हुने खेल बिहान १० बजेदेखि सुरु हुनेछ ।

आज कराँतेको अन्तिम ४ स्वर्णको छिनोफानो पनि हुँदैछ । आयोजककाअनुसार कराँतेको फाइटतर्फ व्यक्तिगत दुई र टीम कुमुतेतर्फ दुई स्वर्ण छिनोफानो हुनेछ ।

कूल १९ स्वर्ण रहेको कराँतेमा जारी सागमा नेपालले अहिलेसम्म सर्वाधिक ९ स्वर्ण, ३ रजत र २ काँश्य हासिल गरिसकेको छ ।

त्यस्तै, तेक्वान्दोमा आज ६ स्वर्णको छिनोफानो हुँदैछ । कूल २९ स्वर्ण रहेको तेक्वान्दोमा पुम्सेतर्फ १३ र फाइटतर्फ ४ गरी १७ वटा स्वर्णको छिनोफानो भइसकेको छ । आज ६ स्वर्णको नतिजा आएपछि ६ स्वर्णको लागि भाेलि प्रतिस्पर्धा हुनेछ । नेपालले ९ स्वर्ण जितिसकेको छ ।

आज उसुतर्फ पनि प्रतिस्पर्धा हुँदैछ । आज दुई स्वर्णको छिनोफानो हुनेछ । त्यस्तै, एथ्लेटिक्सतर्फ काठमाडौंको दशरथ रङ्गशालामा बिहान ९ बजेबाट विभिन्न ९ स्पर्धामा प्रतिस्पर्धा हुनेछ ।

यसैगरी ललितपुरकाे सातदोबाटोमा सुटिङ र टेनिसका खेलहरू हुनेछन् भने आजै गोकर्णमा गल्फ र साइक्लिङ पनि हुँदैछ ।