काठमाडाैं, मंसिर १८ ।
जारी रहेकाे १३ औँ दक्षिण एशियाली खेलकुद (साग)मा नेपालले आजसम्म २९ स्वर्ण जित्दै अग्रस्थान कायमै राख्न सफल भएकाे छ । स्वर्ण पदकमा भारतले नेपाललाई पछ्याउँदै आएकाे छ । भारतकाे अहिले २७ स्वर्ण पदक रहेकाे छ ।

आज १३ औँ सागअन्तर्गत तेक्वान्दोमा नेपालका सक्षम कार्कीले स्वर्ण जितेका छन् । सातदोबाटोस्थित तेक्वान्दो हलमा पुरुष ८७ केजी माथिको गेरुगीमा सक्षमले पाकिस्तानी खेलाडीलाई हराएर स्वर्ण पदक जितेका हुन् ।

तेक्वान्दोमा संगीता बस्यालले स्वर्ण जितेकी छन् । गेरुगीको महिला ६२ केजी तौल समूह मुनि संगीताले स्वर्ण जितेकी हुन् ।

यसैगरी, साइक्लिङमा पुरुषतर्फ नेपालका राजेश मगर र महिलामा निश्मा श्रेष्ठले स्वर्ण जितेकी थिइन् । उसुको थाउलोमा नेपालका दिपक हमालले स्वर्ण जितेका छन् ।

लगनखेलस्थित आर्मी कभर्ड हलमा दिपकले १९ दशमलव तीन दुई अंक ल्याएर स्वर्ण जितेका हुन् । त्यस्तै कराँतेको महिला ६८ केजी माथिको कुमुतेमा अनुपमा मगरले स्वर्ण जितेकी थिइन् ।

कराँतेको पुरुष ५० केजीमा नेपालका सोनाम लामाले काँश्य जितेका छन् । एथ्लेटिक्सको पुरुष १० हजार मिटर दौडमा नेपालका दिपक अधिकारीले काँश्य पदक जितेका छन् ।

त्रिपुरेश्वरस्थित दशरथ रङ्गशालामा भएको १० हजार मिटरको दूरी दिपकले ३० मिनेट ५० दशमलव शून्य छ सेकेण्डमा पुरा गरेका थिए ।

प्रतियोगितामा नेपालले २९ स्वर्ण, १३ रजत र २१ काँश्य गरी कूल ६३ पदक हासिल गर्दै शीर्ष स्थानमा छ । त्यस्तै भारत २७ स्वर्ण, २० रजत र ११ काँश्य गरी कूल ५८ पदक हासिल गर्दै दोश्राे स्थानमा रहेकाे छ ।

श्रीलङ्का ६ स्वर्ण, १८ रजत र ३१ काँश्य गरी कूल ५५ पदक जित्दै तेश्राे स्थानमा रहँदा पाकिस्तान ५ स्वर्ण १२ रजत र १७ काँश्य जित्दै कूल ३४ पदकसहित चौथाे स्थानमा रहेकाे छ ।

बंगलादेश २ स्वर्ण, ६ रजत र २४ काँश्य हासिल गरी कूल ३२ पदकसहित पाँचौँ स्थानमा रहँदा माल्दिभ्स १ स्वर्ण र २ काँश्य पदक हासिल गर्दै छैठौँ स्थानमा रहेकाे छ । भुटान ३ काँश्य पदक प्राप्त गर्दै अन्तिम स्थानमा रहेकाे छ ।