काठमाडाैं, मंसिर २३ ।
नेपालमा जारी रहेकाे १३ औँ दक्षिण एशियाली खेलकुद (साग) प्रतियोगिताअन्तर्गत आज पनि विभिन्न १३ वटा खेलमा प्रतिस्पर्धा हुँदैछ ।

सागमा आज महिलातर्फको फुटबलमा स्वर्णका लागि नेपालले भारतसँग कडा प्रतिस्पर्धामा उत्रिने भएकाे छ । नेपाल सागको महिला फुटबलमा सधैँ रजत पदकमा सीमित हुँदै आएको छ । यो नेपालको लागि इतिहास रच्ने अवसर पनि हो । पोखरा रङ्गशालामा हुने फाइनल खेल आज दिउँसो २ बजेदेखि सुरु हुनेछ ।

साग क्रिकेटअन्तर्गत आज पुरुषतर्फको स्वर्णका लागि श्रीलङ्का र बङ्गलादेशले प्रस्पिर्धा गर्दैछन् । यस्तै, नेपालले काश्य पदकको लागि माल्दिभ्ससँग खेल्नेछ ।

पोखरामा हुने आर्चरीमा आज एकल महिला तथा पुरुषको रिकर्भ र कम्पाउण्ड गरी चार वटा स्वर्ण पदकको लागि प्रतिस्पर्धा हुनेछ । बक्सिङमा आज विभिन्न आठ स्पर्धाको फाइनल हुनेछ । जसमा नेपालका कूल नाै खेलाडी फाइनल पुगेका छन् ।

जनकपुरमा हुने कुस्तीमा आजै दुई स्वर्ण पदकका लागि खेल हुनेछ । त्यस्तै, लगनखेलमा हुने सागअन्तर्गत जुडोमा आज विभिन्न तौल समूहमा सात स्वर्णका लागि प्रतिस्पर्धा हुनेछ ।

हल्चोकस्थित सशस्त्र प्रहरी बलको कभर्ड हलमा हुने कबड्डी खेलमा आज महिला र पुरुष दुबैको फाइनल खेल हुनेछ । पुरुषतर्फ भारतले श्रीलङ्कासँग खेल्नेछ । महिलामा नेपाल र भारतबीच खेल हुनेछ ।

यसैगरी, टेनिसअन्तर्गत आजै महिला र पुरुषतर्फको सिंगल्सका खेलहरू हुनेछन् । सागअन्तर्गत आज फेन्सिङ, पौडी तथा सुटिङका खेलहरू पनि जारी रहनेछन् ।