काठमाडाैं, मंसिर २३ ।
नेपालमा जारी रहेकाे १३ औँ दक्षिण एशियाली खेलकुद (साग)को महिला फुटबलअन्तर्गत आज भएकाे फाइनल खेलमा नेपाल भारतसँग पराजित भएसँगै रजत पदकमा चित्त बुझाउन बाध्य भएकाे छ । पोखरा रङ्गशालामा भएको प्रतिस्पर्धात्मक खेलमा नेपालको महिला टोली भारतसँग दुई शून्य गोल अन्तरले पराजित भएको हो । भारतको जितमा दुबै गोल बाला देवीले गरेकी थिइन् ।

पराजयसँगै साग महिला फुटबलमा स्वर्ण जित्ने नेपालको प्रयास असफल भएको छ । फाइनलमा भारतसँग पराजित भएसँगै नेपाली टोली रजतमा खुम्चिन पुगेकाे हो ।

नेपाली टोली तेश्राे पटक अन्तर्राष्ट्रिय प्रतियोगिताको फाइनलमा पुगेर पराजित भएको हो । यसअघि नेपाली टोली विराटनगरमा भएको साफ च्याम्पियनशीपमा भारतसँग र भुवनेश्वरमा भएको हिरो गोल्डकपमा म्यानमारसँग फाइनलमा पराजित भएको थियो ।