काठमाडाैं, मंसिर २५ ।
हालै नेपालमा भव्य रूपमा सम्पन्न भएकाे १३ औँ दक्षिण एशियाली खेदकुद प्रतियोगिता (साग)मा स्वर्ण पदक विजेता खेलाडीहरूलाई सरकारले जनही ९ लाख रुपैयाँ दिने भएको छ ।

आज दिउँसो प्रधानमन्त्रीकाे सरकारी निवास बालुवाटारमा आयोजित एक कार्यक्रममा प्रधानमन्त्री केपी शर्मा ओलीले स्वर्ण विजेता खेलाडीहरूलाई प्रतिव्यक्ति ९ लाख रुपैयाँ दिने घोषणा गरेका हुन् ।

त्यस्तै, प्रधानमन्त्री ओलीले रजत जित्ने खेलाडीहरूलाई प्रतिव्यक्ति ६ लाख रुपैयाँ र काश्य जित्ने खेलाडीहरूलाई प्रतिव्यक्ति ३ लाख रुपैयाँ दिने बताएका हुन् । प्रधानमन्त्री ओलीले समूहगत स्वर्ण जित्नेलाई पनि जनही पाँच लाख रुपैयाँ दिने बताए ।

पदक विजेता खेलाडीसँगै प्रशिक्षकले पनि सरकारबाट ५ लाख रुपैयाँ पुरस्कार पाउने बताएका छन् । त्यसो त, प्रधानमन्त्री ओलीले मंगलबार दशरथ रङ्गशालामा भएको १३ औँ सागको समापन समारोहलाई भिडियोमार्फत् सम्बोधन गर्दै विजेता खेलाडीहरूलाई उचित पुरस्कार दिने बताएका थिए ।

साथै उनले सबै विजेता खेलाडीहरूलाई बधाईका लागि बालुवाटार आउन आग्रहसमेत गरेका थिए । १३ औँ सागमा घरेलु मैदानमा नेपालले ५१ स्वर्ण, ६० रजत र ९५ काश्य पदक जितेको थियो ।