काठमाडाैं, मंसिर २९ ।
अखिल नेपाल फुटबल संघ (एन्फा) को सहकार्य र नेपाली सेनाको आयोजनामा सञ्‍चालन भएको ‘प्रधानसेनापति सातौँ अन्तर्राष्ट्रिय महिला फुटबल प्रतियोगिता–२०७६’को आज प्रधानसेनापति महारथी पूर्णचन्द्र थापाले जङ्गी अड्डास्थित खेल मैदानमा एक विशेष समारोहकाबीच समुद्‍घाटन गरेका छन् ।

‘प्रधानसेनापति सातौँ अन्तर्राष्ट्रिय महिला फुटबल प्रतियोगिता–२०७६’ मा प्रदेश नं. १, २ र ५ को टीम-३, विभागीय (त्रिभुवन आर्मी क्लब, नेपाल पुलिस क्लब र ए.पी.एफ.) टीम-३ (तीन) र छिमेकी राष्ट्र (भारतको सिक्किम र भुटान) का टीम-२ (दुई) गरी जम्मा आठ वटा टीमको सहभागिता रहेको छ । २०७० सालबाट सुरु भएको उक्त प्रतियोगिताकाे पुरस्कार राशी क्रमश: प्रथमलाई रु. ३,००,०००/-, द्वितीयलाई रु. १,५०,०००/- र तृतीयलाई रु. १,००,०००/- (सेमिफाइनलमा पुग्ने २ वटा टीमलाई रु.५०,०००/-/५०,०००/-) नगद पुरस्कारको व्यवस्था गरिएको छ । साथै, सर्वोत्कृष्ट खेलाडीलाई स्कुटर-१ तथा उत्कृष्ट किपर, मिड फिल्डर, डिफेण्डर, फरवार्ड र प्रशिक्षकलाई समेत नगद पुरस्कार रु.१०,०००/- का दरले प्रदान गरिनेछ ।

आज जङ्गी अड्डास्थित खेल मैदानमा त्रिभुवन आर्मी क्लब र प्रदेश नं.–१ को टीमबीच भएको पहिलो खेलमा शून्यका विरुद्ध ९ गोल गरेर त्रिभुवन आर्मी क्लब विजयी भएको छ । आज भएको पहिलो खेलमा ‘Women of the Match’ घोषित भएकी त्रिभुवन आर्मी क्लबकी शर्मिला थापामगरलाई प्रधानसेनापति थापाले पुरस्कार वितरण गरेका थिए । पौष ९ गतेसम्म सञ्चालन हुने उक्त प्रतियोगिताका सबै खेलहरू लिगकम नक आउटको आधारमा खेलाइने छ ।

समुद्‍घाटन कार्यक्रममा नेपाली सेनाका पूर्वप्रधानसेनापतिहरू, राष्ट्रिय खेलकुद परिषद्का उपाध्यक्ष, अखिल नेपाल फुटबल संघका अध्यक्ष, नेपाली सेनाका बहालवाला तथा अवकाश प्राप्त रथीवृन्द, अन्य सुरक्षा निकायका पदाधिकारीहरू, नेपाली सेनाका अधिकृतहरू, विभिन्‍न मिडियाका सञ्‍चारकर्मीलगायत खेलप्रेमी दर्शकहरूको समेत उल्लेख्य उपस्थिति रहेको थियो ।