काठमाडाैं, पुस ३ ।
इङ्गलिस क्लब लिभरपुल फिफा क्लब विश्वकप फुटबलको फाइनलमा प्रवेश गरेको छ । कतारको दोहामा गएराति भएको मेक्सिकन क्लब मोन्टेरीलाई २–१ गोल अन्तरले पराजित गर्दै उपाधिनजिक पुगेको हो ।

खालिफा अन्तर्राष्ट्रिय मैदानमा भएको खेलको १२ औँ मिनेटमा नेबी केइटाले गोल गर्दै लिभरपुललाई १ विरुद्ध शून्य गाेलको अग्रता दिलाएका थिए । १४ औँ मिनेटमा रोगेलिओ फुनेस मोरीले गोल गर्दै मोन्टेरीलाई खेलमा फर्काएका थिए ।

तर, खेलको इञ्जुरी समयमा रोबर्टो फिर्मिन्होले गोल गर्दै लिभरपुललाई २–१ गाेलले जित दिलाउन सफल भएकाे हाे । अब लिभरपुलले उपाधिका लागि फ्लामेन्गोसँग प्रतिस्पर्धा गर्नेछ ।