काठमाडाैं, पुस ६ ।
गएराति सम्पन्न भएकाे क्लब विश्वकप फुटबलको उपाधि इङ्गलिस क्लब लिभरपुलले जित हात पारेको छ । गएराति कतारको काफिला अन्तर्राट्रिय रङ्गशालामा भएको खेलमा ब्राजिलियन क्लब फ्लामेन्गोलाई १ विरुद्ध शून्य गाेलले हराउँदै लिभरपुलले जित हात पारेकाे हो ।

निर्धारित ९० मिनेटको खेलमा कुनै टोलीबाट गोल नभएपछि खेल अतिरिक्त समयमा धकेलिएको थियो । ९९ औँ मिनेटमा ब्राजिलियन फर्वाड रोबेर्टाे फिर्मिनोले गोल गरी लिभरपुललाई जित दिलाएका हुन् । सेमि फाइनलमा पनि मेक्सिकन क्लब मोन्तेरीसँग जितका लागि फिर्मिनोले नै खेलको अन्तिम समयमा निर्णायक गोल गरेका थिए । १–१ गाेलको बराबरीमा चलिरहेको खेलमा ९० मिनेटपछिको अतिरिक्त समयमा फिर्मिनोले गोल गरी लिभरपुललाई फाइनलमा पुर्‍याएका थिए ।

लिभरपुलले पहिलो पटक फिफा क्लब विश्वकपको उपाधि जितेको हो । सन् २००० बाट शुरु भएको क्लब विश्वकपको यो १६ औँ संस्करण हो । फिफाद्वारा आयोजित यस प्रतियोगितामा महादेशका च्याम्पियन क्लबहरूबीच प्रतिस्पर्धा हुने गर्छ । स्पेनिस क्लब रियल मड्रिडले सबैभन्दा धेरै चार पटक उपाधि जितेको छ । स्पेनिस क्लब बार्सिलोनाले तीन पटक र ब्राजिलियन क्लब कोरिन्थियन्सले दुई पटक उपाधि जितेका छन् ।

इङ्गलिस क्लबले क्लब विश्वकपको उपाधि जितेको यो दोश्राे पटक हो । यसअघि सन् २००८ मा म्याम्चेस्टर युनाईटेडले उपाधि जितेको थियो ।