एजेन्सी, बैशाख १८ ।
भारतको हिमाञ्चल प्रदेशमा पर्ने एउटा गाउँमा अनौठो विवाहलाई देखेर त्यहाँका मानिसहरूले केटा पक्षको प्रशंसा गर्ने गरेका छन् । हरोली विधानसभाका बट्ट कला (बाथु) गाउँका मदनलाल र उनका कान्छा छोरा सुनिल कुमारको अहिले सबैतिरबाट प्रशंसा भइरहेको छ । ससुराली पक्षले विधुवा भएकी आफ्नो बुहारी रेणु बालालाई परम्परागत तरिकाले पुनः विवाह गराई दिएका छन् ।

दुर्भाग्यवश तीन वर्ष अगाडि घरका ठूला छोरा सुरजित सडक दुर्घटनामा परी मृत्यु भएपछि दुःखी भएकी बुहारीको हालत देख्न नसकी ससुराली पक्षले विधुवा भएकी बुहारीलाई आफ्नो कान्छा छोरा सुनिलसँग परम्परागत तरिकाले विवाह गराई दिएका थिए । ससुराली पक्षको यस्तो कदम सबैका लागि प्रेरणाको श्रोतसमेत बनेको छ ।

छिमेकी राष्ट्र भारतमा त्यहाँको सरकारले विधुवा भइसकेकी महिलाहरूलाई विवाहलाई थप प्रोत्साहित गर्दै आएको छ । तर, यस्तो दाबी व्यावहारमाभन्दा कागजमा मात्र सीमित रहँदै आएको छ ।

विधुवा भएकी बुहारीलाई पुनः विवाह गराउने कुरामा हिमाञ्चल जस्तो प्रदेशमा महिलाहरूलाई गर्ने व्यावहार त्यत्ति राम्रो मानिँदैन । तर, मदनलाल र उनको परिवारले एउटा साहसिक कदम चालेको छ । उक्त कदमले समाजमा एउटा शिक्षासमेत प्रदान गरेको छ । बुहारी र छोरीप्रतिको भेद्भाव र गलत दृष्टिकोणलाई ऊजागर गरेको छ ।