धनुषा, माघ ११ ।
स्वास्थ्य चौकी र अस्पताल खोल्ने क्रम जारी रहेसँगै चिकित्सकको लापर्बाहीका कारण बेला–बेलामा बिरामीको मृत्यु भएको घटना सार्वजनिक भइरहेको छ । यसै क्रममा अवैध रूपमा सञ्चालनमा रहेको धनुषाको एक अस्पतालमा चिकित्सकको लापर्बाहीका कारण एक सुत्केरीको ज्यान गएको छ । अवैध रूपमा सञ्चालनमा रहेको भनिएको जनकपुरको एक निजी अस्पतालमा चिकित्सकको लापर्बाहीका कारण सुत्केरीको ज्यान गएको हो ।

जनकपुर अञ्चल अस्पताल अगाडि डा. प्रियरञ्जन कुमारले सञ्चालन गर्दै आएको ‘आर्या केयर एण्ड क्युर’ नामक अस्पतालमा सोमबार २२ वर्षीय जिबछी देवीको उपचारको क्रममा मृत्यु भएको हो ।

सर्लाही जिल्ला डुमरिया घर र जनकपुरको पिडारीमा माइती रहेको जिबछीको चिकित्सकको लापर्बाहीका कारण ज्यान गएको पीडित परिवारको आरोप रहेको छ ।

अनुगमनका क्रममा पुस २७ गते ४० शैय्याको उक्त अस्पताल दुई जना नर्सको भरमा अवैध रूपमा सञ्चालन गर्दै आएको भेटिएपछि स्थानीय प्रशासनले त्यसमा ताला लगाएको थियो । जिल्ला अनुगमन समितिको निर्णय बिना नै जिल्ला जनस्वास्थ्य कार्यालयका प्रमुखले लगाएको ताला खोलिदिएको १३ दिनपछि उक्त घटना हुन गएको हो ।

बजार अनुगमन समिति धनुषाका सदस्य रेणु झाले उक्त निजी अस्पताल सञ्चालनमा आएको बारे जानकारी नभएको बताइन् । अञ्चल अस्पतालबाट सर्वसाधारणलाई फकाएर निजी अस्पतालमा पुर्‍याउने बिचौलिया र सर्वसाधारणको ज्यानसँग खेलवाड गर्ने चिकित्सकलाई कारबाही गर्नुपर्ने माग स्थानीयबासीले गरेका छन् ।