काठमाडाैं, माघ ८ ।
मैत्रीपूर्ण खेलका लागि अखिल नेपाल फुटबल संघ (एन्फा) र इङ्गल्याण्ड फुटबल एशाेसिएशनबीच सम्झौता भएको छ । नेपाल र बेलायतको दौत्य सम्बन्ध दुई सय चार (२०४) वर्ष पुगेको उपलक्ष्यमा मैत्रीपूर्ण खेलमा सहभागिता जनाउने र आयोजना गर्ने सम्झौता पत्रमा हस्ताक्षर भएको हो ।

सम्झौता पत्रमा एन्फा अध्यक्ष कर्मा छिरिङ शेर्पा र इङ्गल्याण्ड फुटबलका लोरेन जोन्सले संयुक्त रूपमा सम्झौता पत्रमा हस्ताक्षर गरेका हुन् ।एन्फा अध्यक्ष शेर्पाले नेपाल र बेलायतको सम्बन्ध दुई सय चार वर्ष पुगेको अवसरमा पहिलो मैत्रीपूर्ण खेल बेलायत र दोश्राे मैत्रीपूर्ण खेल नेपालमा आयोजना हुने जानकारी दिएका छन् ।

एन्फाका वरिष्ठ उपाध्यक्ष पञ्कज विक्रम नेम्वाङले मैत्रीपूर्ण खेलहरू आगामी मे महिनामा सञ्चालन हुने बताए ।

सन् २०२१ मा पनि मैत्रीपूर्ण खेलले निरन्तरता पाउने उनले बताएका छन् । वार्षिक रूपमा मैत्रीपूर्ण खेलको निरन्तरता दिने प्रयास एन्फाबाट हुने र सोहीअनुसार काम अगाडि उनकाे भनाई थियाे ।

मे २५ मा हुने पहिलो मैत्रीपूर्ण खेल सात हजार दर्शक क्षमता रहेको अल्डरसट एफसीको मैदानमा हुनेछ । त्यस्तै, सन् २०२१ को मेमा इङ्गल्याण्डकाे टीम नेपाल आउने छ । नेपालमा हुने खेलको मिति भने अहिले नै तय भने भएकाे छैन ।