हिमालयनलाई पराजित गर्दै थ्रीस्टार शहीद स्मारक ‘ए’ डिभिजनकाे तेश्राे स्थानमा

काठमाडाैं, माघ ९ ।
जारी रहेकाे शहीद स्मारक ‘ए’ डिभिजन लिग खेलअन्तर्गत आज भएकाे खेलमा रुस्लान थ्रीस्टार क्लबले हिमालयन शेर्पा क्लबलाई पराजित गर्दै लिगको तेश्राे स्थानमा उक्लिएको छ ।
त्रिपुरेश्वरस्थित दशरथ रङ्गशालामा आज भएको पहिलो खेलमा रुस्लान थ्री स्टार क्लबले हिमालयन शेर्पालाई ३–१ गाेल अन्तरले पराजित गरेकाे हाे । याेसँगै थ्री स्टारको यो चौथो जित हो ।
खेलको छैटौँ मिनेटमा नै गाेल गर्दै थ्री स्टारले सुरुवाती अग्रता लिएकाे थियाे । सुशील राईको गोलमा थ्री स्टारले अग्रता लिन सफल भएकाे हाे ।
पहिलो हाफको इञ्जुरी समयमा स्टेफेनको गोलमा शेर्पाले थ्री स्टारविरुद्ध बराबरी गोल फर्काएको थियो । यद्यपि, इञ्जुरी समयमै थ्री स्टारका लागि सन्जोक राईले गोल गर्दा पहिलो हाफ २–१ मा टुङ्गिएकाे थियो ।
सन्जोकको गोल जारी रहेकाे लिगमा याे सयौँ गोलसमेत थियाे । जारी लिगको ५१ औँ खेलमा आएर सयौँ गोल गर्न सम्भव भएको हो ।
त्यसपछि खेलको ५१ औँ मिनेटमा थ्री स्टारकै हम्जात गोल गर्न सफल बन्न पुगे । याेसँगै थ्री स्टारले ३–१ गाेलको अग्रता लिएपछि खेलमा अन्य कुनै गोल हुन सकेन ।
जितसँगै थ्री स्टार अंक तालिकाको तेश्राे स्थानमा उक्लिएको छ । ८ खेलमा ४ जित, २ बराबर र २ हार बेहोरेको थ्री स्टारको १४ अंक रहेकाे छ भने शेर्पाकाे ८ खेलमा १ जित, ४ बराबरी र ३ हारसहित ७ अंक जोड्दै ११ औँ स्थानमा पुगेकाे छ ।
प्रतिक्रिया