कास्की, माघ ९ ।
गण्डकी प्रदेशका सांसद् राजीव गुरुङ्ग उर्फ दीपक मनाङ्गेलाई प्रहरीले आज अन्ततः पक्राउ गरेका छन् । उनलाई पोखराको लेकसाइडबाट पक्राउ गरिएको कास्की प्रहरीले जनाएको छ । जिल्ला अदालत पोखराले पक्राउ पूर्जी जारी गरेपछि प्रहरीको टोलीले सांसद् मनाङ्गेलाई पक्राउ गरेको हो ।

मनाङ्गेविरुद्ध अखिल नेपाल फुटबल संघ (एन्फा) कास्कीका अध्यक्ष मिलन गुरुङ्गले बुधबार प्रहरीसामु जाहेरी दिएका थिए । सांसद् मनाङ्गले वार्ता गर्नुको साटो खेल मैदानमा नै कुटपिट गरी अभद्र व्यावहार गरेको भन्दै जाहेरीमा मुलुकी फौजदारी संहिता २०७४ को दफ ११८ को कसुरमा कारबाहीको माग गरिएको थियो ।

मुख्यमन्त्री कप फुटबल प्रतियोगितामा उद्घाटन अघि मनाङ्गले गुरुङ्गलाई मंगलबार झापड हानेका थिए । मनाङ्गेले गुरुङ्गलाई झापड हान्नै पर्ने भएर हानेको बुधबार नै एक पत्रकार सम्मेलनमार्फत् बताएका थिए । साथै उनले हिजो भेटेको भए एन्फा केन्द्रका अध्यक्ष कर्मा छिरिङ्गलाई झापड हान्ने प्रतिक्रियासमेत दिएका थिए ।

मनाङ्गेलाई पक्राउ गरेर म्याद थपका लागि अदलातमा पेश गर्ने तयारी भइरहेको जिल्ला प्रहरी कार्यालय कास्कीका प्रहरी उपरीक्षक (एसपी) दानबहादुर कार्कीले बताएका छन् ।

पक्राउ पर्नुअघि मनाङ्गेले आज बिहान राष्ट्रिय सभा सदस्य निर्वाचनमा मतदानसमेत गरेका थिए । स्वतन्त्र उम्मेदवार भएर मनाङ्गबाट निर्वाचित सांसद् मनाङ्गे केही महिनापछि नेकपामा प्रवेश गरेका थिए ।