काठमाडाैं, माघ २२ ।
आईसीसी विश्वकप क्रिकेट लिग–२ अन्तर्गत आज भएकाे खेलमा नेपाल ओमानसँग १८ रनले पराजित भएकाे छ । ओमानले दिएको १९८ रनको लक्ष्य पछाएको नेपाल ४६ दशमलव ५ ओभरमा १७९ रन बनाउँदै अल आउट भएपछि नेपालले खेल १८ रनले गुमाउन पुगेकाे हो ।

नेपालका लागि शरद भेषवाकरले सर्वाधिक ५५ रन बनाए भने दिपेन्द्र सिंह ऐरीले ३६ तथा सन्दीप लामिछानेले २८ रन बनाएका थिए । त्यस्तै विनोद भण्डारीले २६ रन बनाए । अन्य नेपाली ब्याट्सम्यानहरूले दोहोरो अंकमा रन बनाउन सकेनन् ।

कप्तान ज्ञानेन्द्र मल्ल १ रनमा, पारस खड्का ३ रनमा, आरिफ सेख ६ रनमा, रोहित पौडेल र करण कसी शून्य रनमा आउट भएका थिए ।

ओमानका बलर जिशाम मकसुदले ३ विकेट लिए भने कली मुल्लाहले २ विकेट लिएका थिए ।

यसअघि, टस हारेर पहिला ब्याटिङ्ग गरेको ओमानले ५० ओभरमा ९ विकेट गुमाउँदै १९७ रन बनाएको थियो ।

ओमानका लागि मोहमद नदीमले सर्वाधिक ६९ रन बनाए भने सन्दीप गोउडले ३३ रन बनाए । त्यस्तै कप्तान जिशान मकसुदले २० रन बनाए भने अकिब इयासले १६ रन बनाएका थिए । त्यस्तै नासीम खुशीले २८ रन बनाए ।

नेपाली बलर करण केसीले उत्कृष्ट बलिङ्ग गर्दै सर्वाधिक ४ विकेट लिन सफल भएका थिए । करणले ८ ओभरमा ४७ रन दिएर ४ विकेट लिएका हुन् ।

त्यसैगरी, सुशान भारीले ३ विकेट लिए । भारीले एक दिवसीय अन्तर्राष्ट्रिय खेलको डेभ्यु खेलमा उत्कृष्ट बलिङ्ग गर्दै ३ विकेट लिएका हुन् । उनले १० ओभरमा १४ रन बनाएर ३ विकेट लिएका थिए ।

त्यस्तै दिपेन्द्र सिंह ऐरीले एक विकेट लिए । सन्दीप लामिछाने भने यस खेलमा विकेट विहीन बने । उनले १० ओभरमा एक मेडनसहित ४५ रन दिएका थिए ।

अब सिरिजअन्तर्गत भाेलि बिहीबार ओमान र अमेरिकाबीच खेल हुने छ ।