भक्तपुर, माघ ११ ।
समानुपातिकको नाम लिएर सरकारी वकिलहरूले निहित स्वार्थका लागि बेञ्च बहिष्कार गर्नु गलत भएको कानून, न्याय एवं संसदीय मामिला मन्त्री अजयशंकर नायकले बताएका छन् ।

रफत सञ्चार क्लबद्वारा आयोजित एक साक्षात्कार कार्यक्रममा बोल्दै उनले राष्ट्रको जिम्मेवार निकायमा रहेका सरकारी वकिलहरूले नै समानुपातिकको नाम देखाएर आफ्नो निहित स्वार्थका लागि बेञ्च बहिष्कार गर्नु कानून विपरीत रहेको भन्दै राष्ट्रिय हितका विषयमा सोच्न सरकारी वकिलहरूलाई आग्रहसमेत गरे ।

उनले मधेशी मोर्चा र प्रतिपक्ष दलले आफ्ना हठ् त्यागेर दुबै पक्षले न्यूनतम साझा सहमतिको बिन्दुमा आउनु नै वर्तमान समयको माग रहेको भन्दै उनीहरूले आफ्नो हठ् कायम राखे देशले विभिन्न किसिमका संकट भोग्नु पर्ने र उनीहरूले त्यसको ठूलो मूल्य चुकाउनु पर्ने बताएका छन् ।

मन्त्री नायकले सरकारले चुनाव गराउँदैन भनेर हल्ला चलाउने प्रतिपक्षको कुनै सत्यता नभएको भन्दै सरकारको मुख्य उदेश्य संविधान कार्यान्वयन भएकाले चुनावको कुनै विकल्प नभएको र सबैको मिलन बिन्दु पनि स्थानीय तहको निर्वाचन भएको बताउँदै संशोधनको विधेयक प्रतिपक्षकै सहमतिमा ल्याइएको भन्दै निर्वाचनसम्बन्धी विधेयकसँगै संविधान संशोधन प्रस्तावमा सहमति जुट्ने बताए ।

उनले आफ्नो पार्टीले राष्ट्रिय आवश्यकतालाई मध्ये नजर राख्दै विभिन्न कालखण्डमा त्याग गर्दै आएको र चुनाव मुखे बोली मात्र भएको भन्ने भनाईका साथै आफ्नो पार्टीले पराजय भोग्ने जुन भनाईहरू बाहिर आएको छ त्यसलाई कुनै प्रबाह नगरी संविधान कार्यान्वयनको सफल पक्ष निर्वाचन भएकाले निर्धारित समयमै निर्वाचन गराएरै छाड्ने बताए ।

उनले वर्तमान सरकारले बिग्रिएका कूटनीतिक सम्बन्धलाई सन्तुलित ढङ्गले सुधार गरेको भन्दै केही नेताहरूले नेपालको कूटनीतिक सम्बन्ध बिग्रिएको र राष्ट्रियता इतिहासमै कमजोर भयो भन्नु कुनै सत्यता नभएको भन्दै यो भाम्रक प्रचार प्रसार मात्र भएको बताएका छन् ।