काठमाडाैं, माघ २६ ।
ओमानविरुद्धको खेलमा नेपाल आज पनि पराजित हुन पुगेकाे छ । काठमाडाैंकाे कीर्तिपुरमा भएको आईसीसी मेन्स क्रिकेट विश्वकप लिग २ अन्तर्गतकाे दोश्राे खेलमा ओमान ८ विकेटले विजयी बनेको हो । नेपालले प्रस्तुत गरेको २ सय ५० रनको लक्ष्य ओमानले ४७ दशमलव २ ओभरमा २ विकेट गुमाउँदै पुरा गर्यो ।

याेसँगै नेपाल ओमानसँग लगातार दोश्राे खेलमा पनि पराजित हुन पुगेकाे हाे । यसअघि, पहिलो खेलमा नेपाल ओमानसँग १८ रनले पराजित भएको थियो । बलियो योगफल बनाए तापनि नेपालको बलिङ नचल्दा पराजित हुन पुगेको हो । नेपाल पहिलो खेलमा पनि ओमानसँग १८ रनले पराजित भएको थियो । यो जितसँगै ओमान ९ खेलमा ७ मा जित र २ मा हारसहित १४ अंक जोड्दै शीर्ष स्थानमा उक्लिएको छ ।

ओमानको जितमा अकिब इलासले अविजित रहँदै १ सय ९ रनको शतकीय इनिङ्गस खेले । उनले १ सय ८ बलमा १२ चौका र १ छक्का प्रहार गरे । यस्तै कप्तान जिशन मक्सुदले अविजित रहँदै ६८ रनको अर्धशतकीय इनिङ्गस खेले । खवर अलीले ४१ रन जोड्दा जितेन्दर सिंहले २३ रन बनाए ।

नेपालका सुशन भारी र कुशल मल्लले १/१ विकेट लिएका थिए । यसअघि, टस हारेर पहिले ब्याटिङ गरेको नेपालले ५० ओभरमा ८ विकेट गुमाएर २ सय ४९ रन बनाएको थियो । नेपालको यो एकदिवसीय अन्तर्राष्ट्रियमा विपक्षी टीमलाई दिएको सर्वाधिक ठूलो लक्ष्यसमेत हो । नेपालले यसअघि गत वर्ष यूएईविरुद्ध २ सय ४३ रनको लक्ष्य दिएको थियो ।

यस्तै एकदिवसीय अन्तर्राष्ट्रिय भने नेपालको यो दोश्राे उच्च योगफल हो । यसअघि यूएईविरुद्धको तेश्राे खेलमा नेपालले २ सय ५५ रनको लक्ष्य पुरा गर्दा सर्वाधिक उच्च लक्ष्य बनाएको थियो । नेपालका लागि कप्तान ज्ञानेन्द्र मल्लले ५६ रनको अर्धशतकीय इनिङ्गस खेले । उनले ७६ बलमा ६ चौका र १ छक्का प्रहार गरे । ज्ञानेन्द्रको यो दोश्राे एकदिवसीय अन्तर्राष्ट्रिय अर्धशतक हो ।

यस्तै पारस खड्काले ३८ रन जोड्दा विनोद भण्डारीले ३५ रन बनाए । आरिफ शेख र कुशल मल्ल समान २८/२८ रनमा आउट भए । ओपनर सुवास खकुरेलले २२ रन जोड्दा करण केसी १० रनमा आउट भए ।

दिपेन्द्र सिंह ऐरी शून्य रनमा आउट हुँदा सन्दीप लामिछानेले भने अविजित १० रन बनाएका थिए । डेब्यु खेलाडी कमल सिंह ऐरी भने ९ रनमा अविजित रहे ।