काठमाडौं, फागुन ६ ।
क्रिकेटका महान् खेलाडीको रूपमा परिचित सचिन तेन्दुलकर ‘लोरेस स्पोर्टिङ मोमेन्ट’ पुरस्कारबाट सम्मान गरिएको छ । उनलाई जर्मनीको बर्लिनमा आयोजित एक विशेष समारोहकाबीच सो पुरस्कारबाट सम्मान गरिएको हो ।

सन् २०११ मा भारतले अन्तर्राष्ट्रिय एक दिवसीय क्रिकेटको विश्वकप जितेपछि तेन्दुलकरलाई टोलीका सदस्यले आफ्नो काँधमा राखेर रङ्गशालामा परेड गराएका थिए ।

तेन्दुलकरलाई परेड गराइएको उक्त क्षणले पछिल्लो दुई दशकमा ‘खेलकुदले सर्वसाधारण्लाई असाधारण रूपमा एकताबद्ध’ गरेको भन्दै उनलाई पुरस्कृत गरिएको हो । टेनिसका महान् खेलाडी बोरिस बेकरले पुरस्कृत हुनेको नाम घोषणा गरेका थिए । उनलाई अष्ट्रेलियाली क्रिकेट टोलीका पूर्वकप्तान स्टिभ वाले ट्रफी हस्तान्तरण गरे ।

पुरस्कृत भएपछि तेन्दुलकरले भने, ‘पुरस्कृत हुनु अविश्मरणीय क्षण भएको छ, विश्वकप जितेको क्षणलाई शब्दमा उल्लेख गर्न सकिन्न, असाधारण क्षण थोरै आउँछ, जहाँ समग्र देशले नै उत्सव मनाउँछन् ।’ खेलाडीको रूपमा विश्वकप २०११ मा सचिन तेन्दुलकरको छैठौँ तर अन्तिम विश्वकप थियो ।