काठमाडौं, फागुन ६ ।
वेष्ट इण्डिजका क्रिकेट टीमका तीब्र गतिका बलर ओसेन थोमस चढेको कार दुर्घटनामा परेको छ । उनी चढेको कार आइतबार दुर्घटनामा परेको हो । थोमसको कार अर्को कारसँग ठोक्किँदा पल्टिएको थियो ।

दुर्घटनाबाट उनलाई सामान्य चोट लागेको र अहिले उनी आराम गरिरहेको अन्तर्राष्ट्रिय सञ्चारमाध्यमले उल्लेख गरेको छ ।

दुर्घटनाबाट बेहोस भएका उनलाई नजिकैको अस्पताल पुर्‍याउँदै गर्दा बीच बाटोमा नै होस खुलेकाे थियाे । वेष्ट इण्डिज खेलाडी संघले एक विज्ञप्ति जारी गरी उनको शीघ्र स्वास्थ्य लाभको कामनासमेत गरेको छ ।

तीब्र गतिमा बलिङ गर्ने उनले वेष्ट इण्डिजबाट सन् २०१८ मा भारतविरुद्ध डेब्यु गरेका थिए । यस्तै उनले सन् २०१९ को आईपीएलमा राजस्थान रोयल्सबाट खेलेका थिए । थोमसलाई सन् २०२० को आईपीएलमा राजस्थानले ५० लाखमा अनुबन्ध गरेको छ ।