बार्सिलाेना रियल साेसिडाडमाथि कठिन जित दर्ता गर्दै शीर्ष स्थानमा

काठमाडाैं, फागुन २५ ।
गएराति भएकाे स्पेनिस ला लिगा फुटबलअन्तर्गत क्याटलान क्लब बार्सिलोना शीर्ष स्थानमा उक्लिएको छ । उक्त खेलमा बार्सिलोनाले रियल सोसिडाडमाथि १ विरुद्ध शून्य गाेलको कठिन जित निकाल्दै शीर्ष स्थानमा उक्लिएको हो ।
बार्सिलोनाको घरेलु मैदान क्याम्प नोउमा भएको खेलमा बार्सिलोनालाई कठिन जित दिलाउनको लागि कप्तान लियोनल मेस्सीले पेनाल्टीमार्फत् गोल गरेका थिए ।
खेलको ८९ औँ मिनेटमा आएर कप्तान मेस्सीले पेनाल्टीमार्फत् गोल गरेका हुन् । उक्त गोल नै निर्णायक गोल बन्न पुगेकाे थियाे । सोसिडाडका खेलाडीले बक्समा हेडिङ गर्ने क्रममा ह्याण्ड बल गरेपछि भिएआरले बार्सिलोनालाई पेनाल्टीको मौका दिएको थियो ।
निकै प्रतिस्पर्धात्मक खेलमा खेलभर बार्सिलोनाले सोसिडाडको पोष्टमा १३ पटक प्रहार गर्दा छ पटक मात्रै टार्गेटमा हानेकाे थियाे । सोसिडाडले भने बार्सिलोनाको पोष्टमा नाै पटक प्रहार गरेको थियो तर, एक पटक मात्रै टार्गेटमा हाने ।
यो जितसँगै बार्सिलोनाले रियल मड्रिडलाई २ अंकले पछि पारेको छ । २७ औँ खेलबाट बार्सिलोनाले ५८ अंक जोडेको छ भने बार्सिलोना भन्दा एक खेल कम खेलेको रियल मड्रिडको ५६ अंक रहेको छ । पराजित सोसिडाड ४३ अंकसहित छैटौँ स्थानमा रहेकाे छ ।
आज राति पाैने २ बजे रियल मड्रिडले १४ औँ स्थानको रियल बेटिससँग खेल्दैछ । उक्त खेलमा रियल मड्रिडले स्पष्ट जित निकाले रियल मड्रिड पुन: शीर्ष स्थानमा उक्लिने छ । रियल मड्रिडले खेल हारे वा बराबरी मात्र खेले शीर्ष स्थानमा उक्लिने माैका गुमाउन पुग्नेछ ।
प्रतिक्रिया