काठमाडौं, माघ १२ ।
लोकप्रिय गीत ‘तिरिरी मुरली बज्यो वनैमा’का गायक एवं संगीतकार पन्नाकाजी शाक्यको ८५ वर्षको उमेरमा आज निधन भएको छ । उक्त चर्चित गीत शरदकुमार शाक्यले लेखेका थिए ।

वि.सं. १९८८ साल पुस १५ गते काठमाडौंको ओमबहालमा जन्मिएका पन्नाकाजी २००७ सालमा रेडियो नेपालमा प्रवेश गरेका थिए । साहित्यकार तथा नाटक निर्देशक बालकृष्ण समको विशेष सिफारिसमा रेडियो नेपालका निर्देशक तारणीप्रसाद कोइरालाले उनलाई गायकको रूपमा जागिर दिएका थिए ।

रेडियो नेपालले २०२२ सालमा आयोजना गरेको आधुनिक गीत प्रतियोगितामा नारायणगोपाल संगीतमा प्रथम भएका थिए भने पन्नाकाजी गायनतर्फ प्रथम भएका थिए । उनले ‘किन–किन तिम्रो तस्वीर मलाई निको लाग्छ’ र ‘लोलाएका ती तिम्रा आँखाहरूमा’ को पुरानो मेलोडी, नौलाखे तारा, एकानी दुवानी, रात यो नबित्ला, लालीगुराँस फुल्यो है लगायत सिर्जना गरेका छन् । आधुनिक, भजन, स्वदेश गान, लोकगीत र नेपालभाषाका गरी उनका करिब चार सयभन्दा बढी गीत रेकर्ड छन् ।

पन्नाकाजीका चार छोरा र एक छोरी छन् । दुई छोरा प्रवेशमान र पवित्रमान गायन क्षेत्रमै क्रियाशील र लोकप्रिय पनि रहेका छन् ।
पन्नाकाजीको आजै टेकु दोभानमा दाहसंस्कार गरिने पारिवारिक श्रोतले जनाएको छ ।