भक्तपुर, माघ १२ ।
नेपाल मजदूर किसान पार्टीका अध्यक्ष नारायणमान बिजुक्छे रोहितले भारतीय मार्सल सुरक्षा विमानस्थलमा राखेर नेपालको सुरक्षा नीति कब्जाको रणनीति बनाएको बताएका छन् ।

रफत सञ्चार क्लबद्वारा आज आयोजित एक साक्षात्कार कार्यक्रममा बोल्दै उनले सादा पोशाकका मार्सलहरू विमान सुरक्षाको बहानामा भारतले पठाउँदै भविष्यमा आफ्ना सेनाको सुरक्षा अवस्था देखाएर नेपालको सुरक्षा अवस्था कब्जा गर्ने रणनीति भएको बताएका हुन् ।

हाल नेपाली राजनीतिमा थ्रेस होल्डको विषय निकै चर्चामा रहेको भन्दै उनले थ्रेस होल्ड ठूला राजनीतिक दलहरूलाई निर्वाचनको बखत गरिने खर्चमा लागू गर्नुपर्ने र साना दलहरू जसले मत कम ल्याएका छन् तीनलाई समेत सरकारमा लैजाने काम गलत भएको भन्दै ठूला दलहरूको खर्च र विगतका अपराधिक चरित्र भएकाहरूलाई रोक लगाउन थ्रेस होल्ड आवश्यक रहेको बताए ।

स्थानीय तहको निर्वाचनका बारे सरकारले मुखले मात्र बोलेको तर व्यावहारमा कुनै तयारी नगरेको भन्दै संविधानको सफल कार्यान्वयनका लागि स्थानीय तहको निर्वाचन सबैभन्दा पहिलो आवश्यकता रहेको उनको भनाई थियो ।

उनले धर्मका नाममा जातजाति, भाषाभाषी र क्षेत्रका नाममा दलहरू खोल्न नपाउनु पर्ने भएता पनि देशलाई जुन जुन विषयले घाटा पुग्छ त्यही काम अर्कैको इशारामा गर्ने गर्दा देश नै टुक्रिने अवस्थामा पुगेको बताए ।

संविधान संशोधनको विषयलाई अल्झाउनसमेत निर्वाचनको विषयलाई मुखे बोलीमा व्यापकता दिएको भन्दै अध्यक्ष बिजुक्छेले निर्वाचन गराउने नै भए अन्य काम छाडेर तीब्रताका साथ अघि बढ्नुपर्नेमा जोडसमेत दिएका छन् ।

उनले बालुवाटार, सिंहदरबार र शीतलनिवास अपराधीहरूको संरक्षणको थलो बनेको भन्दै हाल पनि अपराधिक आरोप खेपेकाहरू समेत सांसद् भएको आरोप लगाए ।