काठमाडौं, बैशाख २९ ।
नेपाली राष्ट्रिय फुटबल टोलीका पूर्वसदस्या रञ्जित श्रेष्ठलाई कोरोना भाइरसको संक्रमण देखिएको छ ।

आफू अहिले आइसोलेसनमा रहेको श्रेष्ठ आफैँले सामाजिक सञ्जालमार्फत् जानकारी दिएका छन् ।

फुटबलर श्रेष्ठ हाल दुबईमा रहेका छन् । उनले आफ्नो स्वास्थ्य अवस्था सामान्य रहेको फेसबुकमा राखिएको भिडियोमार्फत् जानकारी दिएका हुन् ।

श्रेष्ठ तीन वर्षयता दुबईमा रहँदै आएका छन् । त्यसअघि उनी दक्षिण कोरियामा पनि केही वर्ष काम गरेका थिए । कुनै समय निकै प्रतिभावान मिडफिल्डरको पहिचानसमेत बनाएका श्रेष्ठ अचानक वैदेशिक रोजगारीका लागि विदेशतर्फ लागेका थिए ।

उनले घरेलु फुटबलमा थ्रीस्टार, संकटा, फ्रेण्ड्स र एनआरटीबाट खेलेका थिए । झापा चन्द्रगढीका श्रेष्ठका भाई रूपकले पनि ‘ए’ डिभिजन लिग फुटबल खेलेका थिए ।