काठमाडाैं, जेठ ३२ ।
स्पेनिस ला लिगाअन्तर्गत सुपरस्टार लियोनल मेसीले नयाँ कीर्तिमान बनाउन सफल भएका छन् ।

कोरोना महामारीले स्थगित भएको ला लिगा सुचारु भएको पहिलो खेलमै एक गोल गरेर मेसीले ला लिगामा यस सिजनमा आफ्नो गोल संख्या २० पुर्‍याएका छन् ।

मल्लोर्काविरुद्ध बार्सिलोना ४ विरुद्ध शून्या गाेलले विजयी भएको उक्त खेलमा गोल गरेसँगै मेसीले लगातार १२ औँ सिजन हरेक सिजनमा २० भन्दा बढी गोल गर्ने नयाँ कीर्तिमान बनाएका हुन् । उनी ला लिगाको इतिहासमा लगातार १२ औँ सिजन कम्तिमा २० गोल गर्ने पहिलो खेलाडीसमेत बनेका छन् ।

अघिल्लो साता सामान्य इञ्जुरी भए पनि मेसी उक्त खेलमा पुरै ९० मिनेट खेलेका थिए भने एक गोल असिस्ट समेत गरेका थिए । मेसीले यस सिजनमा आफ्नो असिष्टको संख्या पनि १४ पुर्‍याएका छन् ।

उनी यस सिजनको ला लिगामा अहिलेसम्म उच्च गोलकर्ता र धेरै असिष्ट गर्ने खेलाडी रहेका छन् ।