काठमाडाैं, असार ९ ।
विश्वव्यापी महामारीकाे रूपमा फैलिरहेकाे काेराेना भाइरस (काेभिड–१९)काे संक्रमणबाट पाकिस्तान क्रिकेट टीमका तीन जना खेलाडीहरूलाई पनि पुष्टि भएको छ ।

पाकिस्तान क्रिकेट बोर्डले हैदर अली, शादब खान र हरिस राउफलाई कोरोना संक्रमण देखिएको जनाएको छ । कोरोना देखिएका खेलाडी सेल्फ आइसोलेसनमा रहेको बताइएको छ ।

इङ्गल्याण्ड भ्रमण अघि गरिएको परीक्षणमा तीन खेलाडीहरूमा कोरोना पोजेटिभ देखिएको हो । कोरोनाको सामान्य लक्षण देखिएपछि खेलाडीमा परीक्षण गरिएको थियो । अन्य दुई खेलाडी इमाद वासिम र उस्मान सिनवारीलाई भने नेगेटिभ देखिएको छ । पाकिस्तानको क्रिकेट टीम आगामी साता इङ्गल्याण्ड भ्रमणमा निस्कदैछ ।

घरेलु टीमसँगको टेष्ट र टी-ट्वान्टी सिरिजका लागि पाकिस्तानी टीम जुन २८ मा इङ्गल्याण्ड प्रस्थान गर्ने बताइएको छ । पाकिस्तानले इङ्गल्याण्डसँग ३ खेलको टेष्ट र टी-ट्वान्टी सिरिज खेल्नेछ ।