काठमाडाैं, मंसिर ११ ।
कार्डियाक एरेस्टका कारण अर्जेन्टिनी फुटबलर डिएगो म्याराडोनाको ६० वर्षको उमेरमा निधन भएको छ ।

अर्जेन्टिनालाई आफ्नो कप्तानीमा सन् १९८६ को विश्वकप जिताएका म्याराडोना पछिल्लो समय जिम्नासिया इग्रिमा ला प्लाटा क्लबको प्रशिक्षक रहँदै आएका थिए । अर्जेन्टिनाको राजधानी ब्युर्नोस आयर्सबाट उत्तरतर्फ रहेको सान आन्द्रेसस्थित आफ्नै निवासमा म्याराडोनाको निधन भएको हो ।

८० वर्षीय ब्राजिली पूर्वस्टार पेलेसँगै म्याराडोना विश्व फुटबल इतिहासकै सर्वाधिक उत्कृष्ट खेलाडी रूपमा लिइन्छ । पेलेले म्याराडोनाको निधनपछि विज्ञप्ती जारी गरेका छन् । ‘उनी जस्ता साथी गुमाउनु दुःखद् हो ।

भगवानले उनको परिवारलाई पर्याप्त शक्ति दिउन् । पक्का छ, कुनै दिन हामी स्वर्गमा एक साथ बल हान्नेछौँ,’ उनले लेखेका छन् । इङल्याण्डका गेरी लिनेकर, अर्जेन्टिनाका निकोलस ट्यागलियाफिक, स्पेनका गुटीलगायत पूर्व स्टारहरूले पनि म्याराडोनाप्रति हार्दिक श्रद्धाञ्जली अर्पण गरेका छन् ।