पर्वत, माघ १३ ।
प्रधानमन्त्री पुष्पकमल दाहालले आगामी बैशाख अन्तिम साता स्थानीय निकायको निर्वाचन हुने दाबी गरेका छन् ।

पाँचौ पर्वत महोत्सवलाई आज सदरमुकाम कुश्माबजारमा सम्बोधन गर्दै उनले निर्वाचनसम्बन्धी विधेयक संसद्बाट पारित भइसकेपछि निर्वाचनको मिति घोषणा गर्ने तयारीमा आफू रहेको बताउँदै उनले भने ‘पहिले कानून निर्माण गर्नुपर्‍यो, त्यसपछि निर्वाचनको मिति घोषणा हुन्छ ।’

प्रधानमन्त्री दाहालले माघ १५ गतेभित्र निर्वाचनको मिति घोषणा भएमा बैशाख अन्तिम सातासम्म चुनाव गर्न सकिने भएकाले दुई/तीन दिनभित्रमा चुनावको मिति घोषणा हुने दाबी गरे । उनले माघ १५ गतेभित्र निर्वाचनसम्बन्धी विधेयक पारित गरिसक्न आफूले सम्बन्धित समितिलाई आग्रह गरिसकेको पनि बताए ।

आगामी २०७४ को माघ ७ गतेसम्म तीनै तहको निर्वाचन गर्नुपर्ने बताउँदै प्रधानमन्त्री दाहालले निर्वाचनमा जाँदा मधेशी, थारू, आदिवासी, जनजातिलाई समेतसँगै लैजानुपर्ने भएकाले संविधान संशोधन गरेर अघि बढ्ने तयारी भइसकेको बताए ।

उनले निर्वाचन गर्ने सम्बन्धमा सबै राजनीतिक दलहरू सहमतिनजिक पुगेको बताउँदै मधेशी मोर्चाका मागलाई पनि सम्बोधन गरेर अघि बढ्न सरकार हरतरहले लागिपरेको बताए । उनले भने, ‘जसरी संविधान जारी गर्दा मुलुकका सबै राजनीतिक शक्ति एकै ठाउँमा उभिएका थिए, त्यस्तै संविधान कार्यान्वयनको सुनिश्चितता र निर्वाचन गर्नका लागि पुनः एकै ठाउँमा उभिनुपर्ने अवस्था आएको छ ।’

मधेश, पहाड र हिमाललाई मिलाएर देशलाई निर्वाचनमा लैजानुपर्ने उल्लेख गर्दै उनले प्रधानमन्त्रीको नाताले आफूले सबै पक्षलाई मिलाउन हरतरहले प्रयत्न गरेको बताए । मुलुक बिखण्डन गर्न खोज्ने तत्व सक्रिय हुँदै गएको बताउँदै प्रधानमन्त्री दाहालले आफूले सत्ता र सत्ता बाहिर रहेका पार्टीलाई यो प्रवृत्तिलाई नियन्त्रण गर्न राज्यकातर्फबाट कठोर कदम चाल्ने चेतावनीसमेत दिए । केही व्यक्तिले भड्काउन खोज्दैमा नेपाली जनताको एकतामा बिखण्डन नआउने उनको तर्क रहेको थियो ।