काठमाडाैं, मंसिर १६ ।
धवलागिरी क्षेत्रका पुराना टेबल टेनिस खेलाडी एवं पूर्वसहायक प्रशिक्षक सुख शाक्यको ६० वर्षको उमेरमा सोमबार निधन भएको छ ।

पोखराको मणिपाल शिक्षण अस्पतालमा उपचारका क्रममा उनको निधन भएको जिल्ला खेलकुद विकास समितिका सदस्य सचिव भीमसेन शाक्यले जानकारी दिएका छन् । बागलुङ नगरपालिका–३ नौबीसेटोल निवासी सुख निमोनियाबाट पीडित थिए ।

टेबल टेनिसको सहायक प्रशिक्षक पदबाट शाक्यले गत वर्ष भाद्रमा अनिवार्य अवकाश पाएका थिए । सुख आफू खेलाडी छँदा तत्कालीन धवलागिरी अञ्चलको प्रतिनिधित्व गर्दै थुप्रै राष्ट्रिय प्रतियोगितामा भाग लिएका थिए ।

टेबल टेनिस खेलेर पहिलो पटक धवलागिरीमा सुखले पदक भित्र्याएको सदस्य सचिव शाक्यले बताए । “धेरै राम्रो खेलाडी हुनुहुन्थ्यो, पछि उहाँको प्रशिक्षणबाट उत्पादन भएका खेलाडी पनि राष्ट्रियस्तरमा चिनिए”, शाक्यले भने । उनले सुखलाई अनुशासित र मिलनसार व्यक्तित्वका रूपमा स्मरण गरे ।

खेल प्रशिक्षणकाे सिलसिलामा सुख केही वर्ष कैलालीमासमेत बसेका थिए । उनले जिल्ला खेलकुद विकास समितिमा लामो समय सेवा गरे । सुखको निधनले जिल्लाको खेलजगत् स्तब्ध बनेको खेलाडी तथा प्रशिक्षक सङ्घ बागलुङका अध्यक्ष राजनकुमार पाइजाले बताए । सुखका एक छोरा र एक छोरी छन् ।