काठमाडाैं, बैशाख ९ ।
काठमाडौंमा जारी त्रिदेशीय टी–२० क्रिकेट शृङ्खलाअन्तर्गत आज भएको लिग चरणको अन्तिम खेलमा नेपालले मलेशियामाथि फराकिलो जित दर्ता गरेको छ । कीर्तिपुरस्थित त्रिवि क्रिकेट मैदानमा भएको उक्त खेलमा नेपालले मलेशियालाई ६९ रनले पराजित गरेको हो । टस जितेर मलेशियाले फिल्डिङ रोजेपछि पहिलो इनिङमा ब्याटिङ गरेको नेपालले करण केसीको विष्फाेटक ब्याटिङको मद्दतमा ७ विकेटको क्षतिमा २ सय १७ रन बनाएको थियो ।

नेपालका लागि करण केसीले विष्फाेटक ब्याटिङ गर्दै १३ बलमै ४५ रन जोडेका थिए । उनले ७ छक्काको मद्दतमा सो रन बनाउन सफल भएका हुन् । यस्तै, आसिफ शेखले ४२, ज्ञानेन्द्र मल्लले ४१, दीपेन्द्र सिंह ऐरीले ३३ रन जोडेका थिए ।

मलेशियाका लागि फित्री शाम, अनवर रहमान र शयद अजिजले दुई–दुई विकेट लिए भने मुहम्मद वाफिकले एक विकेट हासिल गरे । २ सय १८ रनको विशाल लक्ष्य पछ्याएको मलेशिया २० औँ ओभरको पहिलो बलमा सबै विकेट गुमाएर १ सय ४८ रनमा सीमित रहन पुग्याे ।

मलेशियाका लागि अमिनुद्दीन रमलेले ४१, अहमद फैजले ३१ रन बनाए । बलिङतर्फ नेपालका लागि सोमपाल कामी, सन्दीप लामिछाने र कमल ऐरीले तीन–तीन विकेट लिए भने सुशन भारीले एक विकेट हात पारे । लिग चरणमा ६ अंकका साथ नेपाल शीर्ष स्थानमा पुगेको छ भने ५ अंकका साथ मलेशिया दोश्राे स्थानमा रहेकाे छ । उपाधिका लागि यी दुई शीर्ष टोलीबीच भिडन्त हुनेछ ।