काठमाडौं, बैशाख २७ ।
५० औँ एसियन बडी बिल्डिङ एण्ड स्पोर्ट च्याम्पियनशीपका गोल्ड मेडलिष्ट महेश्वर महर्जनलाई अखिल नेपाल खेलकुद संघले सम्मान गरेको छ ।

प्रधानमन्त्री निवास बालुवाटारमा आज बिहान प्रधानमन्त्री पुष्पकमल दाहालको उपस्थितिमा संघले महर्जनलाई सम्मान गरेको हो । महर्जनले सन् २०१६ सेप्टेम्भरमा भुटानमा सम्पन्न ५० औँ एसियन बडी बिल्डिङ एण्ड स्पोर्ट च्याम्पियनसिनमा ७५ केजी तौल समूहमा गोल्ड मेडल प्राप्त गरेका थिए ।

महर्जनलाई सम्मान गर्दै प्रधानमन्त्री पुष्पकमल दाहालले पछिल्लो समय नेपालले खेलकुद क्षेत्रमा राम्रो प्रगति गरेको बताउँदै खेलको विकासले युवाहरूको शारीरिक र बौद्धिक विकास तथा देशको गरिमा र स्वाभिमान उच्च हुने बताए ।

सम्मान कार्यक्रममा युवा तथा खेलकुद मन्त्री दलजीत श्रीपाइली र अखिल नेपाल खेलकुद संघका प्रतिनिधिहरूको सहभागिता रहेको थियो ।