काठमाडाैं, भाद्र १४ ।
नेपालसँगको मैत्रीपूर्ण खेलका लागि भारतीय फुटबल टीम आज नेपाल प्रस्थान गरेका छन् । भारतीय टोलीलाई त्रिभुवन विमानस्थलमा अखिल नेपाल फुटबल संघ (एन्फा) का उपाध्यक्ष शिक्षित पराजुलीलगायतले स्वागत गरेका थिए ।

नेपालसँगको मैत्रीपूर्ण खेलका लागि इण्डिया फुटबल फेडेरेशनले शुक्रबार २५ सदस्यीय टीमको घोषणा गरिसकेको छ । भारतका मुख्य प्रशिक्षक इगोर स्टिमेकले कप्तान सुनिल क्षेत्रीलगायतका सिनियर खेलाडीलाई समावेश गर्दै टीम घोषणा भएकाे हो ।

नेपाल आएलगत्तै कप्तान क्षेत्रीले आफ्नो टीममा पनि युवा खेलाडीको बाहुल्यता रहेको र नेपालसँग खेल्न उत्साहित रहेको बताए । नेपालसँगको खेल आफूहरूलाई निकै महत्वपूर्ण रहेको बताउँदै उनले नेपाली टीमलाई कमजोर नआँक्ने पनि बताए ।

सिनियर खेलाडीहरूको अभाव आफ्नो टीममा खड्कने बताउँदै काठमाडौंमा अभ्यास गरेपछि कमजोरी सुधार हुने उनले बताए । भारतले नेपालसँग त्रिपुरेश्वरस्थित दशरथ रङ्गशालामा दुई मैत्रीपूर्ण खेल खेल्नेछ ।

उक्त मैत्रीपूर्ण खेल भाद्र १७ र २० गते हुनेछ । माल्दिभ्समा आयोजना हुने साफ च्याम्पियनशीपको तयारीका लागि नेपाल र भारतले मैत्रीपूर्ण खेल खेल्न लागेको हो ।