काठमाडाैं, असाेज १८ ।
माल्दिभ्समा जारी रहेकाे १३ औँ संस्करणको साफ च्याम्पियनशीप फुटबलअन्तर्गत आज नेपालले दोश्राे खेल खेल्दै छन् ।

मालेस्थित राष्ट्रिय फुटबल स्टेडियममा नेपालले आज श्रीलंकाको सामना गर्नेछ । नेपाल र श्रीलंकाबीचको खेल राति पाैने १० बजे सुरु हुनेछ ।

नेपालले आज श्रीलंकालाई हराएर लगातार दोश्राे जित निकाल्ने कसरतमा जुटेका छन् ।

नेपाली टीमका कप्तान एवं गोलकिपर किरण चेम्जोङले श्रीलंकाविरुद्ध ३ अंकको लागि खेल्ने बताएका छन् ।

‘श्रीलंकाविरुद्ध हामीले ३ अंकका लागि खेल्नेछौँ । माल्दिभ्सविरुद्धको खेल अघि पनि भनेका थियाैँ हामी गोर्खाली हौँ । हामीले ९० मिनेटसम्मै जितका लागि फाईट गर्नेछौँ,’ कप्तान किरणले भने ।

तर, बलियो टीम श्रीलंकाविरुद्ध नेपाललाई जित निकाल्न त्यति सहज भने पक्कै हुने छैन ।

‘श्रीलंकाविरुद्धको खेल चुनौतीपूर्ण हुनेछ । सजिलो भने हुने छैन । हामीले श्रीलंकाविरुद्ध कम्तिमा पनि १ अंक बटुल्ने अपेक्षा लिएका छौँ,’ मुख्य प्रशिक्षक अब्दुल्लाह अल्मुताइरीले भने, ‘मलाई थाहा छ श्रीलंकाका खेलाडीहरू ट्याकलमा आक्रामक छन् । तर, उनीहरूको आक्रामक खेलको फाइदा उठाउने छौँ ।’

नेपालले पहिलो खेलमा साबिक विजेता तथा आयोजक माल्दिभ्सलाई १ विरुद्ध शून्य गोल अन्तरले पराजित गरेको थियो ।

नेपाललाई जित दिलाउन मनिष डाँगीले निर्णायक गोल गरेका थिए । नेपाल ३ अंक जोडेर शीर्ष स्थानमा रहेको छ ।

श्रीलंका पनि आजकाे खेल आफ्नाे हातमा पार्दै पहिलो जित निकाल्ने योजनामा रहेको छ ।

श्रीलंका पहिलो खेलमा पराजित भएको थियो । श्रीलंकाले बंगलादेशलाई खेल १ विरुद्ध शून्य गाेलले सुम्पिएको थियो ।

साफअन्तर्गत नै आज हुने पहिलो खेलमा भारत र बंगलादेशबीच प्रतिस्पर्धा हुनेछ। भारत र बंगलादेशबीचको खेल दिउँसो पाैने ५ बजे सुरु हुनेछ ।