काठमाडौं, माघ १५ ।
आज माघ शुक्ल प्रतिपदा । तामाङ समुदायको सोनाम ल्होसार पर्व विविध कार्यक्रमको आयोजना गरी मनाइँदै छ । मञ्जुश्री पात्रोअनुसार सो समुदायको आजबाट बाँदर वर्ष पूरा भई चरा वर्षमा प्रवेश भएको छ ।

हरेक वर्ष माघ शुक्ल प्रतिपदाका अवसरमा विभिन्न कार्यक्रम गरी सोनाम ल्होसार पर्व मनाइन्छ । बाँदर, चरा, मुसा, बाघ, बिरालो, घोडा, सुङ्गुर, गोरु, खरायो, भेँडा, सर्प र ड्रागन गरी १२ वर्गमा सोनाम ल्होसारलाई विभाजन गरिएको बौद्धनाथ क्षेत्र विकास समितिका अध्यक्ष एवं तामाङ समुदायको चाडपर्वका विषयमा खोज गरिरहनुभएका सम्पूर्णकुमार लामाले जानकारी दिए ।

‘यस वर्ष बौद्ध स्तूपाको चार ढोका खुल्ने अवसर परेकाले पनि सोनाम ल्होसार विशेष रूपमा मनाइँदैछ, स्तूपा निर्माणको काम चरा वर्षका दिन सुरु भई १२ वर्षपछि चरा वर्षमै सकिएकाले आज बौद्धका चार ढोका खोलिन्छ, आज दर्शनार्थीलाई चारै ढोकाबाट दर्शन गर्न दिइन्छ’ उनले भने ।

सोही अवसरमा नेपाल तामाङ घेदुङले आज काठमाडौंको शान्ति बाटिकामा भेला भई र्‍याली निकाल्ने कार्यक्रम रहेको छ । सोनाम ल्होसार महोत्सवका नाममा तामाङ खाना, भेषभूषा, कला, संस्कृतिलगायतको प्रदर्शनसमेत गरिनेछ ।