एथ्लेटिक बिल्बाओलाई पराजित गर्दै रियल म्याड्रिड ला लिगाकाे शीर्ष स्थानमा

काठमाडाैं, मंसिर १६ ।
एथ्लेटिक बिल्बाओलाई पराजित गर्दै रियल म्याड्रिडले स्पेनिस ला लिगाको शीर्ष स्थानमा आफ्नो पकड मजबुट बनाएको छ ।
खेलमा करिम बेन्जेमाले गरेको एक मात्र गोल नै निर्णायक बन्न पुगेकाे हाे । जितसँगै रियलले शीर्ष स्थानमा ७ अङ्कको अग्रतासमेत बनाउन सफल भएकाे छ ।
फ्रेन्च स्ट्राइकरले पहिलो हाफको अन्त्यतिर लुका मोड्रिचको प्रहारलाई गोलमा परिणत गरेका थिए । यो सिजन सबै प्रतियोगितामा उनको यो १७ औँ गोल रहेकाे छ । ला लिगामा १२ गोल गर्दै यो सिजनमा उनी सर्वाधिक गोलकर्तासमेत बन्न पुगेका छन् ।
बेन्जेमाले सन् २०२१ मा सबै प्रतियोगितामा ४६ खेलमा ३५ गोल गरेका छन् । एउटै वर्ष रियलका लागि सर्वाधिक गोल गरेको आफ्नो रेकर्डलाई उनले बराबरी गरेका छन् । उनले सन् २०१९ मा पनि क्लबका लागि ३५ गोल गरेका थिए । पाहुना टोलीले गोलका लागि प्रयास गरे पनि त्यो सफल हुन सकेन । पछिल्ला ६ खेलमा जितविहीन रहँदै टोली आठौँ स्थानमा रहेको छ ।
प्रतिक्रिया