काठमाडाैं, मंसिर १७ ।
सुरुआती अग्रता जोगाउन नसक्दा फ्रेण्ड्स क्लब शहीद स्मारक ‘ए’ डिभिजन लिगमा छिमेकी थ्री स्टार क्लबसँग अंक बाँड्न बाध्य भएको छ ।

काठमाडाैंकाे त्रिपुरेश्वरस्थित दशरथ रङ्गशालामा भएको उक्त खेलमा ललितपुरका प्रतिद्वन्द्वीले १-१ गोलको बराबरी खेल्दै अंक बाँडेका हुन् ।

पहिलो हाफमा कुनै गोल नहुँदा दोश्राे हाफमा दुबै गोल भएका थिए । खेलमा अग्रता भने फ्रेण्ड्सले बनाएकाे थियाे ।

५१ औँ मिनेटमा फ्रेण्ड्सका नथानियल जुड गार्सियाले अग्रता लिएका हुन् । कप्तान प्रकाश बुढाथोकीले लेफ्ट विङ्गबाट गरेको क्रस बललाई बक्सभित्र रहेका ट्रिनिडाड एण्ड ट्रिबागोका खेलाडी गार्सियाले हेडमार्फत् उत्कृष्ट गोल गरेका थिए ।

मिक्छेन तामाङले थ्री स्टारका लागि बराबरी गोल फर्काएका थिए । खेलको ८२ औँ मिनेटमा रितिककुमार खड्काले गरेको क्रसलाई पेनाल्टी क्षेत्रबाट अनमार्क रहेका मिक्छेनले सहज रूपमा गोल गरेका थिए ।

यसअघि ५० औँ मिनेटमा थ्री स्टारले अग्रता लिने सुनौलो अवसर गुमाउन पुगेका थिए । संजोक राईको पासलाई बक्सभित्र रहेका रितिककुमार खड्काले फ्रेण्ड्सका गोलरक्षक राहुल रामचन्द्र यादवसँगको वान भर्सेष वानको स्थितिमा गोल गर्न सकेनन् ।

सोही रिबाउण्ड बललाई अगाडि बढाउँदै फ्रेण्ड्सले गोल गरेको थियो ।

७५ औँ मिनेटमा थ्री स्टारका संजोक राईले बराबरी गर्ने अवसर गुमाए । संजोगले बक्सको बाहिरबाट गरेको लामो प्रहार गोलकिपर बिट भएको अवस्थामा दोश्राे बारमा लागेर फर्कियो ।

८५ औँ मिनेटमा समेत संजोक गोलबाट टाढा रहे । संजोकको प्रहार डिफेण्डर रोनिल एन्थोनी पौलले गोल लाइनबाट हेड गर्दै बचाएका थिए ।

प्रतियोगितामा फ्रेण्ड्सकाे यो दोश्राे बराबरी हो । यसअघि फ्रेण्ड्स सातदोबाटोसँग गोलरहित बराबरी खेलेको थियो भने दोश्राे खेलमा संकटासँग २–१ गाेल अन्तरले पराजित भएको थियो । फ्रेण्ड्सकाे तीन खेलबाट २ अंक भएको छ ।

थ्री स्टारको यो पहिलो बराबरी हो । पहिलो खेलमा च्यासल युथलाई ३ विरुद्ध शून्य गाेलले पराजित गरेको थ्री स्टार दोश्राे खेलमा सातदोबाटोसँग १ विरुद्ध शून्य गाेलले स्तब्ध भएको थियो । थ्री स्टारको तीन खेलबाट ४ अंक भएको छ । खेलको म्यान अफ दि म्याच फ्रेण्ड्सका गोलकर्ता गार्सिया भए ।

आजै पौने ५ बजे सुरु हुने दोश्राे खेलमा नवप्रवेशी क्लब सातदोबाटो युथ क्लब र विभागीय एपीएफ फुटबल क्लबबीच प्रतिस्पर्धा हुनेछ ।