काठमाडाैं, माघ १८ ।
काठमाडाैंकाे त्रिपुरेश्वरस्थित दशरथ रङ्गशालामा आज भएकाे नेपाल र मरिससबीचकाे दाेश्राे मैत्रीपूर्ण फुटबल खेलमा नेपालले लगातार दाेश्राे जित पनि दर्ता गर्न सफल भएकाे छ । नेपाली राष्ट्रिय फुटबल टीमले दोश्राे मैत्रीपूर्ण खेलमा अफ्रिकी राष्ट्र मरिससलाई १ विरुद्ध शून्य गाेलले हराएको छ ।

आज भएको तनावपूर्ण खेलमा १० खेलाडीमा सीमित नेपालले ९ खेलाडीमा समेटिएको मरिससलाई १ विरुद्ध शून्य गाेल अन्तरले हराएको हो ।

नेपाललाई जित दिलाउन सुजल श्रेष्ठकाे गाेल नै निर्णायक गोल साबित हुन पुगेकाे हाे ।

खेलको १० औँ मिनेटमा सुजलले निर्णायक गोल गरेका थिए । उनको यो नेपालका लागि तेश्राे गोलसमेत हो । आशिष लामाले प्रहार गरेको बलमा पेनाल्टी क्षेत्रभित्र रहेका पुजन उपरकोटीले उपलब्ध ब्याक फ्लिक पासमा सिक्स यार्ड बक्सबाट सुजलले वान टचमा गोल गरेका हुन् ।

यता, मरिसस पेनाल्टीमा चुक्दा नेपालसँग लगातार दाेश्राे हार व्यहोर्न बाध्य हुन पुगेकाे छ । खेलको १३ औँ मिनेटमा मरिससका कप्तान एन्डी सोफीले पेनाल्टीमा गोल गर्न चुकेका थिए । उनको प्रहार नेपालका कप्तान तथा गोलकिपर किरण चेम्जोङले सफलतापूर्वक बचाउ गर्न सफल भएका थिए ।

नेपालका दिनेश राजवंशीले लिन्स्ले बर्सीलाई पेनाल्टी क्षेत्रभित्र लडाएपछि मरिससले पेनाल्टी पाएको थियो । त्यस बाहेक दुबै टोलीले पाएको अन्य अवसरमा गोल गर्न भने सकेनन् ।

छैटौँ मिनेटमा नेपालका दर्शन गुरुङको प्रहार आकाशिएकाे थियाे । खेलको २१ औँ मिनेटमा तेज तामाङको प्रहार पोष्ट नजिकबाट बाहिरिएको थियो । नेपालका तेजले ३६ औँ मिनेटमा मरिससका गोलकिपर पोजिसनभन्दा बाहिर रहेको अवस्थामा प्रहार गरेको बल पोष्ट नजिकैबाट बाहिरिएको थियो ।

लगत्तै ३७ औँ मिनेटमा मरिससका कप्तान एन्डीले सिक्स यार्ड बक्स भित्रबाट प्रहार गरेको बल पोष्ट माथिबाट गएको थियो ।

खेलको ४४ औँ मिनेटमा मरिससका लिन्स्लेले प्रहार गरेको बल नेपालका गोलकिपर किरणले सहजै आफ्नो पञ्जामा पार्न सफल भएका थिए ।

मरिससका भासिस्ट कलकुट्टाले ५१ औँ मिनेटमा गरेको सशक्त प्रहार किरणले बचाए ।

५७ औँ मिनेटमा सुमन लामाको क्रसमा अनमार्क रहेका विमल घर्तिमगरले बल भेट्टाउन सकेनन् ।

खेलको ६२ औँ मिनेटमा नेपालका मनिष डाँगी गोल गर्न चुके । सुजलको फ्री-किकमा मरिससका डिफेन्डरले राम्ररी क्लियर गर्न नसक्दा सिक्स यार्ड बक्स भित्रबाट उनले बाहिर प्रहार गरे ।

६८ औँ मिनेटमा मरिससका कप्तान एन्डीले पेनाल्टी क्षेत्रको एजबाट प्रहार गरेको बल नेपालका गोलकिपर किरणले मुश्किलले बचाए ।

खेलको ७० औँ मिनेटमा मरिसस र नेपाल १० खेलाडीमा समेटियो । एक अर्काविरुद्ध घम्साघम्सीमा उत्रिएपछि मरिससका एड्रियन बोटलरले दुई वटा पहेँलो कार्डसहित रातो कार्ड पाए । नेपालका पुजन उपरकोटीलाई पनि रातो कार्ड देखाउँदै रेफ्री नविन्द्र महर्जनले मैदानबाट बाहिर पठाए ।

७८ औँ मिनेटमा मरिसस ९ खेलाडीमा समेटियो । गौतम श्रेष्ठलाई फउल गरेपछि मरिससका इम्यानुएलले रातो कार्ड पाएका थिए ।

यस्तै, खेलको इञ्जुरी समयमा अञ्जन बिष्टले सिक्स यार्ड बक्स भित्रबाट प्रहार गरेको बल मरिससका गोलकिपरले उत्कृष्ट बचाऊ गरेपछि नेपाल अग्रता दोब्बर बनाउन चुकेको थियो ।