मोरङ, माघ १५ ।
व्यवस्थापिका संसद्मा पेश भएको विधेयक पास भएलगत्तै सबै दलको सहमतिमा निर्वाचनको मिति घोषणा हुने सभामुख ओनसरी घर्तीमगरले बताएकी छन् ।

विराटनगर विमानस्थलमा आज सञ्चारकर्मीहरूसँग संक्षिप्त कुराकानी गर्दै उनले भनिन्, ‘अहिले जे शंकाहरू उब्जिएको छ त्यो स्वाभाविक हो तर, धैर्य गर्नुस् सोमबारपछि स्थानीय तहको निर्वाचन मिति घोषणा हुन्छ ।’

सभामुख घर्तीले मधेशी मोर्चाको सहमतिमा चुनाव हुने बताइन् । निर्वाचनको मिति घोषणा अगाडि नै मधेशी, थारूलगायतको माग संबोधन हुने गरी संविधान संशोधन प्रस्तावमा समेत दलहरूबीच सहमति हुने उनले बताइन् ।

‘मधेशी मोर्चाको समेत निर्वाचनसम्बन्धी विधेयकमा सहमति रहेकोले निर्वाचनको बारेमा कुनै शंका नगर्न आग्रह छ,’ उनले भनिन् ।

उनले २०७४ माघभित्र तीन वटै चुनाव गर्न दलहरूले सहमति गर्ने विश्वास दिलाउँदै उनले भनिन्, ‘अहिले आइरहेको अभिव्यक्ति दलहरूको आ–आफ्नो भएको तर टेबलमा बसेपछि केही छाडेर र केही लिएर सहमति हुन्छ’, ‘दलीय स्वार्थन्दा माथी उठेर राष्ट्र र जनताको पक्षमा निश्कर्ष दिन राजनीतिक दलले लचिलो भूमिका निर्वाह गर्नैपर्छ ।’ उनले भनिन् ।

सभामुख घर्तीले संविधान कार्यान्वयनका लागि बाँकी विधेयकहरू सरकारले समयमा नै पारित गराउने कार्य तीब्रताका साथ अगाडि बढिरहेको जानकारी दिइन् ।