काठमाडाैं, जेठ ८ ।
नेकपा (एमाले)का अध्यक्ष एवं पूर्वप्रधानमन्त्रीसमेत रहेका केपी शर्मा ओलीले भ्यू टावरको अर्थ नबुझ्नेहरूले यसको विरोध गर्ने गरेको टिप्पणी गरेका छन् ।

अध्यक्ष ओलीले भ्यू टावरको अर्थ र महत्व नबुझेकै कारण सत्तारुढ दल नेपाली कांग्रेसले आफ्नो स्थानीय तह निर्वाचनसम्बन्धी घोषणा पत्रमा भ्यू टावर बनाउँदैनौँ भनेर उल्लेख गरेको दाबीसमेत गरेका छन् । आज काठमाडौंमा मीना श्रेष्ठद्वारा लिखित कविता संग्रह ‘फर्गेट एस्टडे’ विमोचन गर्दै उनले भ्यू टावरको विरोध गरेको भन्दै नेपाली कांग्रेसलाई फ्रान्समा बनाइएको इफेल टावरले अर्बौं आम्दानी दिएको स्मरणसमेत गराएका छन् ।

अध्यक्ष ओलीले धान, मकै, कोदो, लिची नफल्ने फ्रान्सको इफेल टावर, वासिंटन टावर र अन्य स्थानहरूमा रहेका टावरहरूले अर्बाैं आम्दानी दिने गरेको बताउँदै उनले त्यस्ता टावरहरू हरेक देशको उचाई भएको र गर्वको विषय रहेको दाबीसमेत गरेका छन् । साेही अवसरमा अध्यक्ष ओलीले इतिहासप्रति गर्व गरेर, त्यसका गौरवपूर्ण कामहरू सम्झेर अगाडि बढ्न पनि सबैलाई आग्रहसमेत गरे ।

उनले कवयित्री श्रेष्ठलाई समाजले फर्गेट एस्टडे लेख्न लगाएको उल्लेख गर्दै अब इतिहासप्रति गौरव गरेर लेख्न लगाउनुपर्ने पनि बताएका छन् ।