डडेल्धुरा, जेठ १९ ।
डडेल्धुरा अस्पतालमा एक बालिकाको समयमै उपचार नपाएकै कारण मृत्यु हुन पुगेको छ ।

घरमा बिरामी भएपछि आज बिहानै अस्पतालमा पुर्‍याएकोमा समयमै आउनुपर्ने डाक्टर नआउँदा मृत्यु भएको बालिकाका आफन्तहरूले आरोप लगाएका छन् ।

भागेश्वर गाउँपालिका–५ सिराड घर भएका प्रकाश थापामगरकी ५ वर्षीया छोरी यनुसा थापामगरलाई उपचारका लागि बिहान ५ बजे अस्पताल पुर्‍याइएको थियो ।

अस्पताल पुर्‍याएको ३ घण्टासम्म पनि डाक्टर नआउँदा बालिकाको मृत्यु भएको भन्दै आफन्तहरूले प्रमुख जिल्ला अधिकारीदेखि अस्पताल व्यवस्थापन समितिलाई गुहारेका छन् ।

अस्पतालको लापर्बाहीका कारण बालिकाको मृत्यु भएको भन्दै बालिकाका आफन्तहरूले अस्पताल विकास समितिका अध्यक्षको राजीनामा र मेडिकल सुपरिटेन्डेन्टको सरुवाको मागसमेत गरेका छन् ।

माग सम्बोधन नभएसम्म बालिकाकाे शव नउठाउने उनीहरूको भनाई रहेकाे छ ।