काठमाडाैं, असार ८ ।
काठमाडाैं महानगरपालिकाकाे बागबजारमा धारा र ट्युवबेलकाे पानीबाट दिदीबहिनीमा हैजा संक्रमण पुष्टि भएकाे छ ।

स्वास्थ्य विभागअन्तर्गतकाे इपीडीमीयाेलाेजी तथा राेग नियन्त्रण महाशाखाका निर्देशक डा. चुम्मनलाल दासकाअनुसार ती दिदीबहिनीहरूले पिएकाे पानीकाे नमूना परीक्षण गर्दा इकाेलाी र काेलीफर्म नामक जीवाणु पुष्टि भएकाे हाे । इकोली र कोलीफर्म मानिसको दिसामा रहने एक संक्रामक जिवाणु हो ।

‘धारा र ट्युवबेलबाट आएको पानीको नमूना परीक्षण गरेका थियौँ । रिर्पोटमा घातक जीवाणु कोलोफर्म र इकोली नै भेटियो,’ डा. दासले भने । हैजा देखिएका अन्य क्षेत्रको पनि पानीको नमूना परीक्षण भइरहेको उनले जानकारी दिएका छन् ।

महाशाखाकाअनुसार अहिलेसम्म ५ जनामा हैजा पुष्टि भइसकेको छ । आज डिल्लीबजारमा हैजाको नयाँ केससमेत पुष्टि भएको छ । ‘बागबजार तथा अन्य हैजा देखिएको स्थानका मानिसलाई अलर्ट गरिसकेका छौँ । पानी उमालेर मात्रै खानु भनेका छौँ,’ डा. दासले भने, ‘केसहरू एक ठाउँमा मात्रै छैन । ठाउँ–ठाउँमा देखिएको छ । अब आउट ब्रेक हुनसक्छ ।’