काठमाडाैं, असार २१ ।
देशभर पछिल्लो २४ घण्टामा थप ९० जनामा कोरोना भाइरस सङ्क्रमण पुष्टि भएको छ । सो अवधिमा ३ हजार १ सय १२ को नमूना परीक्षण गरिएको थियो ।

१ हजार ९ सय ४४ जनाले पीसीआर र १ हजार १ सय ५८ को एन्टिजेन विधिबाट परीक्षण गरिएको स्वास्थ्य तथा जनसङ्ख्या मन्त्रालयले जनाएको छ ।

सो अवधिमा २० जना सङ्क्रमण मुक्त भएका छन् । यससँगै सङ्क्रमण मुक्त हुनेको सङ्ख्या ९ लाख ६७ हजार ५ सय ५५ पुगेको छ । सङ्क्रमण मुक्त हुने दर ९८ दशमलव ७ प्रतिशत रहेको मन्त्रालयले जनाएको छ । पछिल्लो २४ घण्टामा १ लाख ११ हजार ५ सय ३१ जनाले कोभिडविरुद्धको खोप लगाएका छन् ।

हाल सक्रिय सङ्क्रमितको सङ्ख्या ४ सय १ रहेको छ । अहिलेसम्म कोरोनाबाट मृत्यु हुनेको सङ्ख्या ११ हजार ९ सय ५२ पुगेको छ । होम आइशाेलेशनमा ३ सय ९९, संस्थागत आइशाेलेशनमा २, आईसीयूमा २ र भेन्टिलेटरमा १ जना सङ्क्रमित रहेका छन् ।

हाल देशभरमा २ सय जनाभन्दा बढी सक्रिय सङ्क्रमित भएका जिल्ला कुनै पनि छैनन् ।

शून्य सङ्क्रमित रहेका जिल्लामा सोलुखुम्बु, सङ्खुवासभा, तेह्रथुम, ताप्लेजुङ, सप्तरी, मनाङ, मुस्ताङ, म्याग्दी, गोरखा, तनहुँ, नवलपरासी दाङ, अर्घाखाँची, जाजरकोट, जुम्ला, डोल्पा, हुम्ला, रुकुम पश्चिम, कालीकोट, मुगु, बाजुरा, दार्चुला, बझाङ, डडेलधुरा र कञ्चनपुर रहेका छन् ।

उपत्यकाका तीन जिल्लामध्ये हाल काठमाडौं जिल्लामा २ सय १९ जना र ललितपुर जिल्लामा ३४ जना र भक्तपुर जिल्लामा १० जना सक्रिय सङ्क्रमित रहेको मन्त्रालयले जनाएको छ । कूल सङ्क्रमण दर १७ प्रतिशत रहेकाे छ ।